ភ្នំពេញ៖ ប្រធានាធិបតីអាមេរិក ដូណាល់ ត្រាំ បានផ្ញើសារលិខិតផ្លូវការមួយច្បាប់ជូនចំពោះសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បញ្ជាក់អំពីមូលហេតុ និងផលវិបាក ដែលនាំឱ្យមានការពន្យារពេលកិច្ចប្រជុំអាស៊ាន-អាមេរិក ដែលគ្រោងធ្វើឡើងនៅខែមីនា ឆ្នាំ២០២០នេះ ដោយសារតែការរីករាលដាលនៃជំងឺកូវីដ១៩។
សូមបញ្ជាក់ថា សហរដ្ឋអាមេរិកបានសម្រេចចិត្តពន្យារពេលរៀបចំកិច្ចប្រជុំកំពូល ជាមួយថ្នាក់ដឹកនាំកំពូលនៃបណ្តាប្រទេសអាស៊ានទាំង១០ ដែលគ្រោងធ្វើឡើងនៅថ្ងៃទី១៤ ខែមីនា ឆ្នាំ២០២០ ខាងមុននេះ នៅទីក្រុងឡាសវេហ្គាស រដ្ឋណេវ៉ាដា ដោយសារក្តីព្រួយបារម្ភកាន់តែខ្លាំងឡើង ចំពោះការរីករាលដាលនៃវីរុសកូរ៉ូណាថ្មី ឬ COVID-19។
ក្នុងសារលិខិតរបស់ខ្លួន លោកដូណាល់ ត្រាំបានបញ្ជាក់បន្តថា «ជាអកុសលយើងត្រូវតែពន្យារពេល កិច្ចប្រជុំកំពូលនេះដោយមើលឃើញពីហានិភ័យជាសកលដែលបង្កឡើងដោយការផ្ទុះឡើងនូវវីរុសកូរ៉ូណាថ្មី។ ខ្ញុំជឿជាក់ថា យើងទាំងអស់គ្នាអាចឯកភាពដោយផ្ដោតការយកចិត្តទុកដាក់របស់យើងនៅពេលនេះ នូវការសម្របសម្រួលការឆ្លើយតបជាសកល ដែលការពារ និងធានាសុខភាព និងសុវត្ថិភាពរបស់ប្រជាជនយើង»។
លោកប្រធានាធិបតីមានជំនឿថា ថ្នាក់ដឹកនាំអាស៊ាន នឹងអាចកោះប្រជុំកិច្ចប្រជុំកម្ពស់ពិសេសនេះ ឡើងវិញនៅពេលអនាគត ដ៏ខ្លីខាងមុខនេះទេ៕
