ភ្នំពេញ ៖ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានថ្លែងថា ក្នុងខែកុម្ភៈ ឆ្នាំ២០២០នេះ ចំណូលចូលអគ្គនាយកដ្ឋាន និងរដ្ឋាករកម្ពុជា មានការធ្លាក់ចុះបន្ដិចដោយសារបញ្ហា ជំងឺកូរ៉ូណាប្រភេទថ្មី។
ក្នុងសន្និសីទសារព័ត៌មាន ស្ដីពី «វឌ្ឍនភាព និងទិសដៅការងាររបស់ ក្រសួងសេដ្ឋកិច្ច និងហិរញ្ញវត្ថុ» នៅថ្ងៃទី៥ ខែមីនា ឆ្នាំ២០២០ លោក គុណ ញឹមមានប្រសាសន៍ថា «ខែកមុ្ភៈនេះ ចំណូល របស់យើងទាប ជាងផែនការបន្ដិច ។ ឆ្នាំ២០២០ អគ្គនាយកដ្ឋានគយ និងរដ្ឋាករកម្ពុជា ផែនការដែលកំណត់ ដោយច្បាប់ហិរញ្ញវត្ថុ គឺត្រូវប្រមូលឲ្យបាន ២៩០០លានដុល្លារ ។ បើសិនគិតជាមធ្យមប្រចាំខែ យើងត្រូវប្រមូលឲ្យបានជិត ២៥០លានដុល្លារ សម្រាប់ខែមួយ យើងប្រមូលបាន ២៥៥លានដុល្លារ មានន័យថា លើសផែនការបន្ដិច ។ប៉ុន្ដែសម្រាប់ខែពីរ យើងប្រមូលបានតែ២៣៥លានដុល្លារទេ ដូច្នេះខ្វះបន្ដិច»៕
