ភ្នំពេញ៖ អង្គការ NPA និងអង្គភាពស៊ីម៉ាក់ នៅថ្ងៃទី៥ ខែមីនា ឆ្នាំ២០២០នេះ បានចុះហត្ថលេខា លើកិច្ចសហប្រតិបត្តិជាដៃគូ លើគម្រោងស្រាវជ្រាវព័ត៌មាន និងបោសសម្អាតសំណល់ គ្រាប់បែកចង្គោម ដែលគាំទ្រថវិកាដោយរដ្ឋាភិបាលសហរដ្ឋអាមេរិក និងមានថវិកាគាំទ្រគម្រោងចំនួន ១.៦០០.០០០ដុល្លារ ។
យោងតាមបណ្ដាញសង្គមហ្វេសប៊ុក លោក ហេង រតនា អគ្គនាយកអង្គភាពស៊ីម៉ាក់ បានឲ្យដឹងថា គម្រោងនេះមានរយៈពេល ១២ខែ (ចាប់ពីថ្ងៃទី១ ខែមីនា ២០២០ ដល់ទី២៨ ខែកុម្ភៈ ឆ្នាំ២០២១) គាំទ្រថវិកាដោយរដ្ឋាភិបាលសហរដ្ឋអាមេរិក និងមានថវិកាគាំទ្រគម្រោងចំនួន ១.៦០០.០០០ដុល្លារ ។ គម្រោងនេះនឹងអនុវត្ត នៅតាមបណ្តាខេត្តមួយចំនួនដូចជា ខេត្តកំពង់ចាម ត្បូងឃ្មុំ ស្វាយរៀង ក្រចេះ ស្ទឹងត្រែង តាកែវ និងខេត្តព្រៃវែងជាដើម ហើយរំដោះផ្ទៃដីបានចំនួន ១៩.០១៦.៩៣២ម៉ែត្រក្រឡា ស្រាវជ្រាវផ្ទៃដីចំនួនប្រមាណ ៣០គីឡូម៉ែត្រក្រឡា និងត្រូវប្រើប្រាស់កម្លាំងប្រតិបត្តិការប្រមាណ ២៣០នាក់ ។
សូមរំលឹកជូនថា ១២ខែកន្លងមក (ចាប់ពីថ្ងៃទី១ ខែមីនា ឆ្នាំ២០១៩ ដល់ថ្ងៃទី២៩ ខែកុម្ភៈ ២០២០) គំរោងនេះសំរេចបានលទ្ធផល បានល្អដោយការរំដោះផ្ទៃដីបាន ១០២% នៃផែនការ ការងារស្រាវជ្រាវពត៌មានសំរេចបាន ១៥១% នៃផែនការ។ ពោលគឺរំដោះផ្ទៃដីបានចំនួនជាង ២.៧៣៣ហិកតា ដោយរុករកឃើញគ្រាប់បែកទម្លាក់ ពីយន្តហោះប្រភេទ MK ចំនួន ៤៥គ្រាប់ គ្រាប់បែកចង្កោម៥.៩៩៨គ្រាប់ គ្រាប់មិនទាន់ផ្ទុះគ្រប់ប្រភេទ (UXO) ចំនួន ១១.៩៨៨គ្រាប់។ ការងារស្រាវជ្រាវពត៌មានបាន ៧៦១ភូមិ រកឃើញ ១.១០៣ទីតាំង ដែលបញ្ហារងការគំរាមកំហែង ដោយសារគ្រាប់និងគ្រាបមីន ដែលគិតជាផ្ទៃដីប្រមាណ ១៩.១០០ហិចតា។ សមិទ្ធិផលនេះបានចេញពី កិច្ចសហការយ៉ាងល្អជាមួយអង្គការ NPA និងការគាំទ្រផ្តល់ជំនួយ របស់ប្រជាជន និងរដ្ឋាភិបាលសហរដ្ឋអាមេរិក ដូចគ្នានឹងឆ្នាំ២០២០នេះផងដែរ ៕
