ភ្នំពេញ៖ កម្ពុជាអនុញ្ញាតអោយនាវាទេសចរណ៍ដែលមានផ្ទុកមនុស្សជាង២២០០នាក់ ចូលចតនៅកំពង់ផែព្រះសីហនុ បន្ទាប់ពីប្រទេស៥ និងកោះ១ បដិសេធមិនអោយចូលចត។
នាវាយក្សដែលផ្ទុកមនុស្សចំនួន ១៤៥០នាក់ និងក្រុមនាវិក៨០០នាក់នេះនឹងមកដល់កំពុងផែព្រះសីហនុ នៅម៉ោង ០៧:០០នាទីព្រឹក ថ្ងៃព្រហស្បតិ៍ទី១៣ ខែកុម្ភៈ ។ នាវា ទេសចរណ៍ ឈ្មោះ MS Westerdam កំពុងធ្វើដំណើរសំដៅមកកាន់ក្រុងព្រះសីហនុ ប្រទេសកម្ពុជា ។
នាវាខាងលើនេះដែរ បានសំដៅមកកាន់ខេត្តព្រះសីហនុ បន្ទាប់ពីប្រទេសមួយចំនួនបដិសេធការចូលចតដោយសារមូលហេតុខ្លាចមានអ្នកដំណើរមានផ្ទុកមេរោគកូរ៉ូណា ទោះបីខាងនាវាអះអាងថា គ្មានអ្នកឈឺក៏ដោយ។ ភ្ញៀវទេសចរណ៍ចម្រុះជាតិសាសន៍ទាំងអស់ដែលក្នុងនោះមានជនជាតិអាមេរិក៦៥០នាក់ផងដែរ បានថ្លែងអំណរគុណយ៉ាងជ្រាលជ្រៅចំពោះអជ្ញាធរកម្ពុជាដែលបានផ្ដល់ការគាំទ្រពួកគេក្នុងការចូលចតនៅកម្ពុជា ខណៈដែលពួកគេកំពុងខ្វះស្បៀងអាហារ និងត្រូវចាក់ប្រេងផងដែរនោះ ។
គួរបញ្ជាក់ផងដែរថា មកដល់ដំណាក់កាលនេះ បញ្ហាជំងឺខូវីដ១៩ ឬកូរ៉ូណា បានបណ្តាលឲ្យមនុស្សស្លាប់ ១១១០នាក់ នឹងជិត ៤៥០០០ ករណីដែលកំពុងឆ្លង៕
