ភ្នំពេញ៖នៅថ្ងៃទី៦ ខែកុម្ភៈ ឆ្នាំ២០២០ កម្លាំងអធិការដ្ឋាននគរបាលស្រុកបានបង្ក្រាបករណីចោរកម្ម(លួចគោ)មេ២ក្បាលនិងឃាត់ខ្លួនបុរសចំណាស់២នាក់នៅចំណុចភូមិលលៃឃុំបាគង ស្រុកប្រាសាទបាគង ខេត្តសៀមរាប។
ក្នុងប្រតិបត្តិការនេះ សមត្ថកិច្ចឃាត់ខ្លួនជនសង្ស័យ២នាក់៖
១.ជនសង្ស័យឈ្មោះ សៅ ភ្លឿយ ភេទប្រុស អាយុ៤៤ឆ្នាំ ភូមិត្រាវគៀត ឃុំដានរុន ស្រុកសូទ្រនិគម ខេត្តសៀមរាប។
២.ជនសង្ស័យឈ្មោះ សំ ជា ភេទប្រុស អាយុ៥០ឆ្នាំ ភូមិបាតត ឃុំគោកធ្លកក្រោម ស្រុកជីក្រែង ខេត្តសៀមរាប។
លោកវរសេនីយ៍ទោ លឹម សម្បត្តិ អធិការនៃអធិការដ្ឋាននគរបាលស្រុកប្រាសាទបាគង បានបញ្ជាក់ថាពេលកម្លាំងនគរបាលចេញល្បាត ក៏ប្រទះឃើញ ម៉ូតូសណ្តោងរ៉ឺម៉ក ចំនួន ០១គ្រឿង ម៉ូតូស៊ុម័រ ពណ៌ក្រហម០១គ្រឿង ដឹកគោមេ ចំនួន០២ក្បាល និងបើកបរដោយជនសង្ស័យទាំងពីរនាក់។ តាមរយៈការសាកសួររបស់សមត្ថកិច្ច ជនសង្ស័យបានសារភាពថា ពួកគេពិតជាបានធ្វើសកម្មភាពលួចគោ នៅភូមិលលៃពិតប្រាកដមែន។
បច្ចុប្បន្ន ជនសង្ស័យត្រូវបានសមត្ថកិច្ចធ្វើការឃាត់ខ្លួន និងកំពុងកសាងសំណុំរឿងបញ្ជូនទៅសាលាដំបូងខេត្តដើម្បីអនុវត្តតាមនីតិវិធីច្បាប់បន្ត ៕
