ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងប្រាប់គណៈប្រតិភូនៃកិច្ចប្រជុំកំពូលពិភពលោកឆ្នាំ២០២០ នៃអង្គការសហព័ន្ធសន្តិភាពសកល (UPF)ថា ការប្រែប្រួលអាកាសធាតុ ប៉ុន្មានឆ្នាំចុងក្រោយនេះ បានវិវត្តទៅជាហានិភ័យដ៏ធំមួយ ដែលគំរាមកំហែង ដល់ការអភិវឌ្ឍ និងសន្តិសុខរបស់មនុស្សជាតិ ។
ក្នុងឱកាសអញ្ជើញឡើងថ្លែងសុន្ទរកថានៅថ្ងៃអង្គារ ទី៤ ខែកុម្ភៈ ឆ្នាំ២០២០ក្នុងកិច្ចប្រជុំកំពូលពិភពលោកឆ្នាំ២០២០ នៃអង្គការសហព័ន្ធសន្តិភាពសកល (UPF) ស្តីពីសន្តិភាព សន្តិសុខ និងការអភិវឌ្ឍមនុស្ស ដែលរៀបចំឡើងនៅសាធារណរដ្ឋកូរ៉េ (កូរ៉េខាងត្បូង) សម្ដេចតេជោ ហ៊ុន សែន បានអះអាងថា ការកើនឡើងកំដៅភពផែនដី, កំណើនជាលំដាប់នូវកម្ពស់ទឹកសមុទ្រ, ការបាត់បង់ជីវចម្រុះ និងធនធានធម្មជាតិគ្រោះធម្មជាតិ, គ្រោះធម្មជាតិកាន់តែធំ និង ញឹកញាប់ព្រមទាំងការរាំងស្ងួត ជាបន្តបន្ទាប់នូវប្រភពទឹកសំខាន់ៗ នឹងក្លាយជាប្រធានបទ ដែលប្រទេសជាច្រើនបាននិងកំពុងជជែកដ៏ក្ដៅគគុក និងមានទំនោរក្លាយជាមូលហេតុនៃជម្លោះ រវាងប្រទេសនិងប្រទេសនាពេលអនាគត ៕
