ភ្នំពេញ៖ ជនសង្ស័យ២នាក់ រួមជាមួយថ្នាំញៀន ជិត៦០០គ្រាប់ ត្រូវបានកម្លាំងអធិការដ្ឋាននគរបាលស្រុកបូរីអូរស្វាយសែនជ័យ សហការជាមួយកម្លាំងនគរបាលប៉ុស្តិ៍រដ្ឋបាលឃុំព្រះរំកិល ឃាត់ខ្លួន។ ប្រតិបត្តិការខាងលើបានធ្វើឡើងកាលពី២៧ ខែមករា ឆ្នាំ២០២០ វេលាម៉ោង០៨និង៥០នាទី នៅចំណុចជាំតាលឹមលើផ្លូវកៅស៊ូ ស្ថិតក្នុងភូមិអន្លង់ស្វាយ ឃុំព្រះរំកិល ស្រុកបូរីអូរស្វាយសែនជ័យ ខេត្តស្ទឹងត្រែង។
មន្ត្រីនគរបាលខេត្តស្ទឹងត្រែង បានឲ្យដឹងថាជនសង្ស័យទាំង២នាក់រួមមានទី១-ឈ្មោះ បៃ សែងចាន់ ភេទប្រុស អាយុ៤០ឆ្នា ជនជាតិខ្មែរ មុខរបរកសិករ រស់នៅភូមិកំពង់សាម៉ី ឃុំស្រឡៅពី ស្រុកឆែប ខេត្តព្រះវិហារ។ ជនសង្ស័យទី២-ឈ្មោះ ហ្វយ ឡៃ ភេទស្រី ជនជាតិខ្មែរ មុខរបរកសិករ រស់នៅភូមិកំពង់សាម៉ី ឃុំស្រឡៅពី ស្រុកឆែប ខេត្តព្រះវិហារ។
វត្ថុតាងដកហូត៖ ថ្នាំញៀនប្រភេទមេតំហ្វេតាមីន(WY) ចំនួន៣កញ្ចប់ ពណ៌ខៀវកិបមាត់ ស្មើនិង៥៨៦គ្រាប់ ទម្ងន់សរុប៥៥,៥៥ក្រាម និងម៉ូតូមួយគ្រឿងម៉ាកស្មាស់ ពណ៌ក្រហម គ្មានស្លាកលេខ។
បច្ចុប្បន្នកម្លាំងការិយាល័យប្រឆាំងគ្រឿងញៀនខេត្តកំពុងរៀបចំសំណុំឯកសារបញ្ជូនជនសង្ស័យនិងវត្ថុតាង ទៅអយ្យការអមសាលាដំបូងខេត្ត និងស្វែងរកមុខសញ្ញាពាក់ព័ន្ធផ្សេងទៀតដើម្បីចាត់ការតាមនីតិវិធី ៕
