រដ្ឋបាលខេត្តព្រះសីហនុ ច្រានចោលព័ត៌មានជំងឺរលាកសួតប្រភេទថ្មីកើតលើទឹកដីខេត្តព្រះសីហនុ

ភ្នំពេញ៖ រដ្ឋបាលខេត្តព្រះសីហនុ បានធ្វើការច្រានចោលនូវព័ត៌មានដែលបំពុលថា ជំងឺរលាកសួតប្រភេទថ្មី កូរ៉ូណា ស្វែងរកឃើញនៅទឹកដីកំពង់សោម​។
យោងតាមគណនីហ្វេសប៊ុក Kanha Leng បានសរសេរថា អរុណសួរស្តីអ្នកទាំងអស់គ្នា ជូនដំណឹងថា ជំងឺរលាកសួត Wuhan ស្វែងរកឃើញនៅ កំពង់សោម ឥលូវសូមថែរក្សាសុខភាពទាំងអស់គ្នា​។ គណនីដដែលបានបន្ត​ថា មានអ្នកដំណើរម្នាក់ មានបញ្ហាជំងឺខាងលើ នៅពេលដែលមកដល់ព្រលានយន្តហោះអន្តរជាតិកំពង់សោម ហើយក្រុមការងារនៅព្រលានបានឃាត់គាត់ ដាក់បន្ទប់មួយដោយឡែក រងចាំ​ការបញ្ជាក់ ។​

ទោះបីជាយ៉ាងនេះក្តី រដ្ឋបាល​ខេត្តព្រះសីហនុ បានច្រានចោលនូវព័ត៌មានខាងលើ ដោយបានអះអាងថា គិតត្រឹមម៉ោងនេះនៅក្នុងទឹកដីខេត្តព្រះសីហនុទាំងមូល មិនមានករណីជំងឺរលាក សួតប្រភេទថ្មី (កូរ៉ូណា​) នេះឡើយ​។រាល់ការផ្សាយព័ត៌មានដែលគ្មានមូលដ្ឋាន​នៃការពិតគឺជាការបំពុលសង្គម​ និងធ្វើឲ្យមានការជ្រួលច្របល់ ។​

ដោយឡែកនៅលើផេក លោក សម្ដី​ ផៃ​ស៊ី​ផាន បានសរសេរថា« មកទល់ពេលនេះប្រទេសកម្ពុជាពុំទាន់កើតមានករណីជម្ងឺរលាកសួតកូរ៉ូណាប្រភេទថ្មីឡើយ។ នេះជាការបញ្ជាក់ដោយក្រសួងសុខាភិបាល។ សូមបញ្ជាក់ថា រាល់ព័ត៌មានផ្លូវការនឹងត្រូវប្រកាសដោយអង្គភាពអ្នកនាំពាក្យរាជរដ្ឋាភិបាល និងក្រសួងសុខាភិបាល។
សូមអរគុណ!»៕