ភ្នំពេញ ៖ ដើម្បីឱ្យប្រជាពលរដ្ឋងាកមកប្រើប្រាស់រថយន្តក្រុងសាធារណៈវិញ ដោយមិនចាំបាច់ប្រើប្រាស់សេវាឯកជន ដោយរដ្ឋបាលរាជធានីភ្នំពេញបានប្រជុំសម្រេចបើកគន្លងផ្លូវអាទិភាពសម្រាប់រថយន្តក្រុងរត់នៅចំកណ្តាលទ្រូងតែម្ដងលើផ្លូវហ្ស៊ាលឌឺហ្គោល ដល់ច្រមុះជ្រូកស្ទឹងមានជ័យ។
កាលពីរសៀលថ្ងៃទី១៧ ខែមករា ឆ្នាំ២០២០ ក្នុងកិច្ចប្រជុំគណៈកម្មាធិការរៀបចំផ្លូវអាទិភាពរថយន្តក្រុង និងដឹកជញ្ជូនសាធារណៈ citybus នៅសាលារាជធានីភ្នំពេញអភិបាលរាជធានីភ្នំពេញ លោក ឃួង ស្រេង បានប្ដេជ្ញាថា នឹងកែសម្រួលផ្លូវរត់រថយន្តក្រុងសាធារណៈឱ្យកាន់តែប្រសើរឡើង ដើម្បីឱ្យប្រជាពលរដ្ឋងាកមកប្រើប្រាស់រថយន្តក្រុងសាធារណៈវិញ ដោយមិនចាំបាច់ប្រើប្រាស់សេវាឯកជន ដោយរដ្ឋបាលរាជធានីភ្នំពេញនឹងរៀបចំផ្លូវអទិភាពមួយសម្រាប់តែរថយន្តក្រុងតែម្តង ពោលគឺនឹងបើកគន្លងផ្លូវអាទិភាពរថយន្តក្រុងនៅចំកណ្តាលទ្រូងផ្លូវ ដោយចាប់ពីចំណុចប្រសព្វមហាវិថីព្រះមុនីវង្ស និងមហាវិថីហ្ស៊ាលឌឺហ្គោលដល់ច្រមុះជ្រូកស្ទឹងមានជ័យ។
លោកឃួង ស្រេង បានបញ្ជាក់ផងដែរថា នេះជាការងារចាំបាច់សម្រាប់រាជធានីភ្នំពេញ ដោយត្រូវធ្វើយ៉ាងណាឱ្យរថយន្តក្រុងសាធារណៈធ្វើចរាចរណ៍ទៅដោយរលូន មិនមានការកកស្ទះចរាចរណ៍ ។ បើការងារនេះទទួលបានជោគជ័យហើយនោះ ប្រជាពលរដ្ឋនឹងងាកមកប្រើប្រាស់សេវាដឹកជញ្ជូនសាធារណៈរថយន្តក្រុងជាក់ជាមិនខាន។ អ្វីជាគម្រោង ដែលត្រូវអនុវត្តគឺជ្រើសរើសយកផ្លូវមួយខ្សែដោយចាប់ចាកចេញពីផ្លូវប្រសព្វរវាងមហាវិថីព្រះមុនីវង្ស និងមហាវិថីហ្សាឌឺហ្គោលជិតផ្សារធំថ្មីទៅដល់ច្រមុះជ្រូកស្ទឹងមានជ័យ។
អភិបាលរាជធានី ក៏បានបញ្ជាក់ផងដែរថា បើគម្រោងទីមួយទៅលើផ្លូវអទិភាពមួយខែនេះទទួលបានជោគជ័យរដ្ឋបាលរាជធានីភ្នំពេញនឹងធ្វើការសិក្សាទៅលើបណ្ដាញផ្លូវផ្សេងៗទៀត ដើម្បីធ្វើយ៉ាងណាឱ្យខ្សែរត់នៅក្នុងរាជធានីភ្នំពេញទទួលបានការគាំទ្រ និងពេញចិត្តពីប្រជាពលរដ្ឋ ហើយការងារនេះអាចសម្រេចបានគឺត្រូវតែមានការចូលរួមពីអាជ្ញាធរខណ្ឌ និងសមត្ថកិច្ចពាក់ព័ន្ធ ៕
