ពីថ្ងៃនេះដល់ពាក់កណ្ដាលខែមករានៅកម្ពុជាមានសីតុណ្ហភាពអប្បបរមាពី២០-២៦អង្សាសេ និងអាចមានភ្លៀងនៅតំបន់មាត់សមុទ្រ

ភ្នំពេញ៖ ក្រសួងធនធានទឹក និងឧតុនិយម នៅថ្ងៃទី០៨ ខែមករា ឆ្នាំ២០២០នេះ បានចេញសេចក្តីជូនដំណឹងស្តីពី ស្ថានភាពអាកាសធាតុ ចាប់ពីថ្ងៃនេះ ដល់ថ្ងៃទី១៤ ខែមករា ឆ្នាំ ២០២០ ដោយបញ្ជាក់ថាសីតុណ្ហភាពអប្បបរមាពី២០-២៦អង្សាសេ និងអតិបរមាពី២៩-៣៤អង្សាសេ។
ក្រសួងបានឲ្យដឹងថា តាមរយៈការតាមដានស្ថានភាពអាកាសធាតុជាប់ជាបន្ត សង្កេតឃើញថា ជ្រលងសម្ពាធខ្ពស់ ជាមួយនិងខ្យល់មូសុងឦសានខ្សោយបក់គ្របដណ្តប់ លើកម្ពុជា។ ស្ថានភាពបែបនេះធ្វើឲ្យ៖
១៖ តំបន់ជួរភ្នំដងរែក និងខ្ពង់រាបឦសាន ៖
* សីតុណ្ហភាពអប្បបរមា មានពី ២០-២៤ °C
* សីតុណ្ហភាពអតិបរមា មានពី ២៩-៣២ °C ។
២៖ តំបន់វាលទំនាបកណ្តាល ៖
* សីតុណ្ហភាពអប្បបរមា មានពី ២៤-២៦ °C
* សីតុណ្ហភាពអតិបរមា មានពី ៣២-៣៤ °C ។
៣៖ តំបន់មាត់សមុទ្រ ៖
* សីតុណ្ហភាពអប្បបរមា មានពី ២៤-២៦ °C
* សីតុណ្ហភាពអតិបរមា មានពី ៣០-៣២ °C ។
ក្រសួងបញ្ជាក់ទៀតថា ក្នុងចន្លោះនៃរយៈពេលព្យាករណ៍នេះ អាចមានភ្លៀងខ្សោយ ពិសេសនៅបណ្តាខេត្តនាតំបន់មាត់សមុទ្រ៕