ភ្នំពេញ៖ក្រោយសង្កេតឃើញថា ស្ថានីយវិទ្យុ ទូរទស្សន៍នីមួយៗបានចាក់ផ្សាយ
បទភ្លេងគោរពទង់ជាតិដោយឡែកៗពីគ្នា និងនៅពេលវេលាខុសៗគ្នាក្រសួងព័ត៌មានស្នើឱ្យម្ចាស់ស្ថានីយវិទ្យុ និងទូរទស្សន៍ទាំងអស់ចាក់ផ្សាយបទភ្លេងគោរពទង់ជាតិ នៅម៉ោង៧៖០០ នាទីព្រឹក និងម៉ោង១៧៖០០ នាទីល្ងាច។
យោងតាមសំណើររបស់ក្រសួងព័ត៌មានផ្ញើជូនម្ចាស់ស្ថានីយទូរទស្សន៍និងវិទ្យុនៅថ្ងៃទី២៥ធ្នូបានឲ្យដឹងថា
កន្លងមក ស្ថានីយវិទ្យុ ទូរទស្សន៍ទាំងអស់បានចាក់ផ្សាយបទភ្លេង
គោរពទង់ជាតិនៃព្រះរាជាណាចក្រកម្ពុជា នៅតាមស្ថានីយវិទ្យុ ទូរទស្សន៍រៀងៗខ្លួន ពេលព្រឹកនៅវេលាម៉ោង
៧:០០នាទី និងពេលល្ងាចនៅវេលាម៉ោង១៧:០០នាទី ដើម្បីឱ្យមន្ត្រីរាជការ កងកម្លាំងប្រដាប់អាវុធ និងបងប្អូនប្រជាពលរដ្ឋនៅទូទាំងព្រះរាជាណាចក្រកម្ពុជាគោរពទង់ជាតិនិងជាការដាស់តឿនបំផុសស្មារតីរបស់ប្រជាពលរដ្ឋយើងឱ្យមានសាមគ្គីភាពឯកភាពជាតិជាធ្លុងមួយរឹងមាំដូចសម័យមហានគរតាមបាវចនា ជាតិ សាសនាព្រះមហាក្សត្រ និងថែរក្សាបានគង់វង្សនូវអត្តសញ្ញាណជាតិគួរជាទីមោទន:។
ជាមួយគ្នានេះដែរ ក្រសួងព័ត៌មាន បានសង្កេតឃើញថា ស្ថានីយវិទ្យុ ទូរទស្សន៍នីមួយៗបានចាក់ផ្សាយ
បទភ្លេងគោរពទង់ជាតិដោយឡែកៗពីគ្នា និងនៅពេលវេលាខុសៗគ្នា។ ស្ថានីយវិទ្យុ ទូរទស្សន៍ខ្លះពេលព្រឹក
ចាក់ផ្សាយនៅវេលាម៉ោង៧:០០នាទីគត់ ហើយនៅពេលល្ងាចចាក់ផ្សាយនៅវេលាម៉ោង១៧:០០នាទីគត់ ប៉ុន្តែ
មានស្ថានីយវិទ្យុ ទូរទស្សន៍ខ្លះទៀត បានចាក់ផ្សាយបទភ្លេងគោរពទង់ជាតិ និងនៅពេលវេលាខុសៗគ្នា។
ដូច្នេះដើម្បីឱ្យមានការឯកភាពគ្នាក្នុងការចាក់ផ្សាយបទភ្លេងគោរពទង់ជាតិនៃព្រះរាជាណាចក្រកម្ពុជា
បានព្រមៗគ្នានៅក្នុងពេលវេលាតែមួយ និងបទភ្លេងតែមួយ ក្រសួងព័ត៌មានសូមឲ្យ ម្ចាស់ស្ថានីយវិទ្យុឯកជនទាំងអស់ត្រូវធ្វើការផ្សាយបន្តផ្ទាល់ពីវិទ្យុជាតិកម្ពុជា FM96MHz និងស្ថានីយ
ទូរទស្សន៍ឯកជនទាំងអស់ត្រូវធ្វើការផ្សាយបន្តផ្ទាល់ពីស្ថានីយទូរទស្សន៍ជាតិកម្ពុជា ឱ្យបានព្រមៗគ្នាជារៀង
រាល់ថ្ងៃ ពេលព្រឹកនៅវេលាម៉ោង៧:០០នាទីគត់ និងពេលល្ងាចវេលាម៉ោង១៧:០០នាទីគត់៕
