ភ្នំពេញ៖លោកស៊ូ សុជាតិ អគ្គនាយកនៃគណៈកម្មការមូលបត្រកម្ពុជា បានថ្លែងថា ក្នុងឆ្នាំ២០១៩នេះ វិស័យមូលបត្រមានការកើនឡើងគួរឲ្យកត់សម្គាល់ បើធៀបទៅនឹងឆ្នាំ២០១៨ខណៈ ការអភិវឌ្ឍវិស័យមូលបត្រ គឺជាកម្មវត្ថុយុទ្ធសាស្ត្រមួយ នៃវិស័យហិរញ្ញវត្ថុ ដែលទទួលបានការយកចិត្តទុកដាក់ខ្ពស់ពីរាជរដ្ឋាភិបាលកម្ពុជា។
ក្រោយបញ្ចប់ សិក្ខាសាលា ផ្សព្វផ្សាយស្តីពី “ វិស័យមូលបត្រ និងប្រសិទ្ធភាព ក្នុងការផ្សព្វផ្សាយ ព័ត៌មានក្នុងសម័យសេដ្ឋកិច្ចឌីជីថល និងការប្រកួតប្រជែងសរសេរអត្ថបទព័ត៌មានក្នុងវិស័យមូលបត្រកម្ពុជា” សម្រាប់អ្នកសារព័ត៌មាន លើកទី១០ នៅថ្ងៃទី១៣ ខែធ្នូ ឆ្នាំ២០១៩នាទីស្ដីការគណៈកម្មការមូលបត្រកម្ពុជាលោកស៊ូ សុជាតិថ្លែងប្រាប់អ្នកសារព័ត៌មានថា “រៀងរាល់ឆ្នាំយើងមានកំណើនតិចតួចមែនទែនប៉ុន្តែក្នុងឆ្នាំ២០១៩នេះយើងមានកំណើនមួយគួរឲ្យកត់សម្គាល់ “។
លោកបន្តថា ទោះបីជាមានកំណើនកើនយ៉ាងនេះក្ដី តែគណៈកម្មការមូលបត្រកម្ពុជា នៅតែបន្តតាមដាននិងសង្កេតមើលតទៅទៀតកុំឲ្យការកើនឡើងនេះមានបញ្ហាអ្វីមួយដែលកើតឡើងដោយមិនប្រក្រតី។
លោកអគ្គនាយកបញ្ជាក់ថា រហូតមកដល់នេះ គណៈកម្មការមូលបត្រកម្ពុជា មានក្រុមហ៊ុនសរុបចំនួន៨ហើយដែលមកចុះបញ្ជី ដោយក្នុងនោះមានក្រុមហ៊ុនចំនួន ៥ បានបោះផ្សាយលក់មូលបត្រកម្មសិទ្ធិ និងក្រុមហ៊ុន៣ទៀត បានបោះផ្សាយលក់មូលបត្របំណុល (Bond) ដែលមានទំហំទឹកប្រាក់សរុប ចំនួន១៥១លានដុល្លារ (មូលបត្រកម្មសិទ្ធិ ៨០ លានដុល្លារ និង មូលបត្របំណុល ៧១ លានដុល្លារ)។
លោកបន្ថែមថា នឹងមានក្រុមហ៊ុនបោះផ្សាយបន្ថែមទៀត ជាបន្តបន្ទាប់នៅក្នុងឆ្នាំខាងមុខនេះ ដោយក្រុមហ៊ុនខ្លះ ជិតបញ្ចប់នីតិវិធីនៃការបោះផ្សាយផងដែរ៕
