ភ្នំពេញ ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន បានឲ្យដឹងថាបច្ចុប្បន្នមានរថយន្ដប្រមាណជា៣០ម៉ឺនគឿង បានហួសសពុលភាព ត្រួតពិនិត្យលក្ខណៈបច្ចេកទេសយានយន្ត (ឆៀក) ដូច្នេះម្ចាស់រថយន្ដទាំងនោះ ត្រូវយករថយន្ដមកឆៀកឲ្យបានត្រឹមត្រូវ ។
សព្វថ្ងៃនេះ មជ្ឈមណ្ឌល ឆៀក រថយន្ដនៅកម្ពុជា មាន១៥កន្លែង រួមមាន ៖ ៥កន្លែង នៅរាជធានីភ្នំពេញ ១កន្លែងទៀតក្រុមហ៊ុនកូរ៉េ កំពុងសាង់សង ។ ចំណែក ៩កន្លែងទៀត នៅតាមបណ្ដាខេត្ត ដូចជា ៖ ខេត្តកំពង់ឆ្នាំង បាត់ដំបង សៀមរាប ព្រះវិហារ ក្រចេះ រតនគីរី កំពង់ស្ពឺ ព្រះសីហនុ និងស្វាយរៀង ក្នុងនោះ ក៏មានរថយន្ដឆៀកចល័ត៤គ្រឿងផងដែរ។
ក្នុងពិធីដាក់សម្ពោធឲ្យប្រើប្រាស់មជ្ឈមណ្ឌល ឆៀក ខណ្ឌឬស្សីកែវ នាថ្ងៃទី១២ ខែធ្នូ ឆ្នាំ២០១៩ លោក ស៊ុន ចាន់ថុល បានថ្លែងថា មន្ដ្រីឆៀករថយន្ដត្រូវឲ្យមានតម្លាភាពដាច់ខាត់ មិនត្រូវយកថវិកាក្រៅពីម្ចាស់រថយន្ដ ដើម្បីឲ្យរថយន្ដនោះ ចេញសញ្ញាត្រឹមត្រូវ បើធ្វើរបៀបនេះ មន្ដ្រីឆៀក នឹងទទួលទោសចំពោះមុខច្បាប់។
លោកក៏បានអំពាវនាវឲ្យទៅដល់ម្ចាស់រថយន្ដមិនទាន់មកឆៀក ត្រូវយករថយន្ដមកឆៀក ឲ្យបានទាន់ពេលវេលា បើមិនដូច្នេះទេ នគរបាលមានសិទ្ធិចាប់រថយន្ដណាមិនទាន់មកធ្វើឆៀក។ លោកថា ការឆៀករថយន្ដត្រឹមត្រូវ នឹងកាត់បន្ថយគ្រោះថ្នាក់ចរាចណ៍៕
