ភ្នំពេញ៖ អគ្គកុងស៊ុលថ្មី នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា លោក ហ៊ូ វ៉ៃ បានចូលជួបសំដែងការគួរសម លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅស្នងការដ្ឋាននគរបាលរាជធានីភ្នំពេញ ដើម្បីសំណេះសំណាលសាកសួរសុខទុក្ខ និងលើកឡើងពីកិច្ចពង្រឹងសហប្រតិបត្តិការលើការងារសន្តិសុខ និងបង្កើនទំនាក់ទំនងឱ្យកាន់តែរឹងមាំ ។នេះបើយោងតាមអគ្គស្នងការនគរបាលជាតិ។
អគ្គកុងស៊ុលថ្មី នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា លោក ហ៊ូ វ៉ៃ ក៏បានលើកឡើង និងអរគុណដល់កម្លាំងនគរបាលរាជធានីភ្នំពេញកន្លងមក មានកិច្ចសហប្រតិបត្តិការល្អជាមួយស្ថានទូតចិន ក៏ដូចជាសមត្ថកិច្ចចិនលើការងារសន្តិសុខ និងជាពិសេសបានការពាររក្សាសុវត្ថិភាពជនជាតិចិនដែលមកវិនិយោគ និងមកទេសចរ នៅព្រះរាជាណាចក្រកម្ពុជា ។ ក៏ដូចជាធ្លាប់ទប់ស្កាត់ និងបង្ក្រាបបានទាន់ពេវេលាជនជាតិចិនខិលខូចមួយចំនួនតូច ដែលបានចាប់ជំរិតទារប្រាក់ជនជាតិចិន នៅស្ថានទូតចិនកន្លងទៅនេះ ។ លោកចង់បានឱ្យការទំនាក់ទំនង និងកិច្ចសហប្រតិបត្តិការនេះកាន់តែរឹងមាំថែមទៀត ។
លោក ហ៊ូ វ៉ៃ ក៏បានលើកទឹកចិត្តដល់កម្លាំងសមត្ថកិច្ចកម្ពុជា ចាត់វិធានការចំពោះជនជាតិចិនខិលខូចបង្កអសន្តិសុខ ចាត់ការតាមផ្លូវច្បាប់ ពីព្រោះមិនចង់ឱ្យមានជនជាតិចិនមួយក្តាប់តូចបង្កបញ្ហាអសន្តិសុខ ហើយប៉ះពាល់កិត្តិយសជនជាតិចិនដែលល្អៗ មករកស៊ីបណ្តាក់ទុនស្របច្បាប់នៅព្រះរាជាណាចក្រកម្ពុជា ជាពិសេសមិនចង់ឱ្យប៉ះពាល់ចំណងមិត្តភាពរវាងចិននិងកម្ពុជា ។
កិច្ចពិភាក្សានោះផងដែរ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ឧត្តមសេនីយ៍ឯក ស ថេត ក៏បានជម្រាបជូនដល់អគ្គកុងស៊ុលថ្មី នៃសាធារណរដ្ឋប្រជាមានិតចិន ប្រចាំព្រះរាជជាណាចក្រកម្ពុជា ឱ្យដឹងថាកម្លាំងការពារសន្តិសុខកម្ពុជាមានសមត្ថភាពគ្រប់គ្រាន់ការពាររក្សាសុវត្ថិភាពជូនដល់ជនបរទេសទូទៅដែលមកបណ្តាក់ទុនរកស៊ីនិងមកទេសចរណ៍នៅព្រះរាជាណាចក្រកម្ពុជា។សមត្ថកិច្ចកម្ពុជាតែងតែយកចិត្តទុកដាក់ការពារបង្ការទប់ស្កាត់ និងបង្ក្រាបទាន់ពេលវេលារាល់សភាពការណ៍បទល្មើសកើតឡើងគឺធ្វើយ៉ាងណាការពារសន្តិសុខធានាសុវត្ថិភាពជូនអ្នកវិយោគ និងអ្នកទេសចរបរទេសឱ្យបានល្អដើម្បីផ្តល់ជំនឿ ទុកចិត្តលើការដឹកនាំរបស់រាជរដ្ឋាភិបាលកម្ពុជា ។ ពីព្រោះអ្នកទេសចរ និងអ្នកវិនយោគទុនបរទេសបានចូលរួមចំណែកធំធេង ក្នុងការកសាងអភិវឌ្ឍន៍ប្រទេសកម្ពុជាមានការរីកចម្រើន ។
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោកឧត្តមសេនីយ៍ឯក ស ថេត ក៏បានជម្រាបជូនទៀតថាកន្លងមកសមត្ថកិច្ចកម្ពុជា និងសមត្ថកិច្ចចិនមានកិច្ចសហប្រតិបត្តិការល្អបានចូលរួមទប់ស្កាត់ និងបង្ក្រាបបទល្មើសជាច្រើនសម្រេចបានលទ្ធផលល្អផងដែរ ៕
