ភ្នំពេញ៖ ជាការកាន់ទុក្ខរំលឹកដល់ខួប ៧ឆ្នាំ នៃការយាងចូលព្រះទិវង្គត ព្រះបរមរតនកោដ្ឋ អ្នកគាំទ្រជួរមុខក្នុងក្រុមកងទ័ពអង្គរ គឺពូឈីវ បានចំណាយ ថវិកាផ្ទាល់ខ្លួនរៀបចំ និងព្រីន ព្រះឆាយាល័ក្ខណ៍ព្រះបរមរតនកោដ្ឋ យកមកបង្ហាញក្នុងព្រឹត្តិការណ៍ ការប្រកួតរវាងកម្ពុជា និង អ៊ីរ៉ាក់ នាល្ងាចម្សិលមិញ។
ពូឈីវ បានឲ្យដឹងថា ដោយសារតែរំលឹកដល់គុណូបការៈ របស់ព្រះបរមរតនកោដ្ឋ និងជាថ្ងៃដែលព្រះអង្គយាងចូលព្រះទិវង្គតផង ខ្ញុំបាទក៏បាន សម្រេចថាចំណាយថវិកាផ្ទាល់ខ្លួនដើម្បីបង្កើតព្រឹត្តិការណ៍ ដោយលើក ព្រះឆាយាល័ក្ខណ៍ព្រះបរមរតនកោដ្ឋ ឡើងដោយមានទាំង ព្រះឆាយាល័ក្ខណ៍ធំ និងតូចៗ ។
លោកថាដោយសារតែស្រលាញ់ព្រះអង្គផង ទោះដាច់លុយ ដាច់បាយក៏មិនថ្វីនោះទេ ដោយម្សិលមិញនេះ បានចំណាយចូលខ្ទង់ រយដុល្លារ ដើម្បីបង្ហាញព្រះឆាយាល័ក្ខណ៍ព្រះបរមរតនកោដ្ឋ ក្នុងព្រឹត្តិការណ៍ការប្រកួតបាល់រវាងកម្ពុជា និង អ៊ីរ៉ាក់ ។ លោកថា ថវិកានោះ ជាថវិកាផ្ទាល់ខ្លួន មិនមាន បងប្អូនណាឧបត្ថម្ភឡើយ ក៏ព្រោះតែចិត្តស្រលាញ់ ។
បញ្ជាក់ផងដែរថា ព្រះបាទសម្ដេច នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះអង្គយាងចូលព្រះទិវង្គត នៅថ្ងៃទី១៥ ខែតុលា ឆ្នាំ២០១២ ដោយរោគាពាធ ក្នុងព្រះជន្មាយុ ៩០ព្រះវស្សា នៅមន្ទីរពេទ្យនាទីក្រុងប៉េកាំង ប្រទេសចិន៕
