ភ្នំពេញ៖ លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានបង្ហាញព័ត៌មានថ្មីមួយទៀតនៅលើហ្វេសប៊ុករបស់លោក ពាក់ព័ន្ធនឹងករណីកងកំលាំងកម្ពុជានៅបន្ទាត់ព្រំដែនស្រុកជាំក្សាន្ត ខេត្តព្រះវិហារ កំពុងប្រឈមមុខដាក់គ្នាជាមួយយោធាឡាវ នឹងត្រៀមជម្លៀសប្រជាជនចេញ បើសិនមានករណីអាសន្នកើតឡើង។
បើតាមសក្តីរាយការណ៍របស់មន្ទីរព័ត៌មានខេត្តព្រះវិហារ បានរាយការណ៍ជូនលោករដ្ឋមន្ត្រីព័ត៌មាន ថា នៅថ្ងៃទី២៣ ខែសីហា ឆ្នាំ២០១៩ សភាពការណ៍ព្រំដែនកម្ពុជា- ឡាវ បើតាមរបាយការណ៍លោកអធិការស្រុកជាំក្សាន្តនិងកងកម្លាំងជួរមុខសកម្មភាពយោធាឡាវបន្តឈរជើងនៅចំណុចដដែល ពិនិត្យឃើញមានការកើនកម្លាំងជាងមុន ។ ក្នុងនោះដែរ ខាងកងកំលាំងយោធា របស់កម្ពុជា
ក៌បានបន្ថែមនៅគ្រប់គោលដៅត្រៀមចាំបញ្ជា។
គួររំលឹកផងដែរថា បញ្ហាប្រឈមមុខដាក់គ្នារវាងកងកំលាំងកម្ពុជា ជាមួយឡាវ នេះ នៅថ្ងៃទី២២ ខែសីហា ឆ្នាំ២០១៩ ឯកឧត្តម ស្រីឌឹក មេបញ្ជាការកងពលធំលេខ3 បានប្រជុំផ្សព្វផ្សាយដល់ថ្នាក់ដឹកនាំនិងសមត្ថកិច្ចស្រុកជាំក្សាន្តអោយធ្វើការត្រៀមលក្ខណះ ជម្លៀសប្រជាជនចំនួន 4ភូមិក្នុង2ឃុំ ។
របាយការណ៍បន្តថាប្រជាជនដែលរស់នៅ ភូមិរបុញ ភូមិសែនតេជះ ភូមិមរកតតេជោក្នុងឃុំមរកតនិង ភូមិ សែនរុងរឿង ក្នុងឃុំទឹកក្រហមស្រុកជាំក្សាន្ត អោយមកស្នាក់ជានៅគោលដៅចំណុចស្រះម្លិះ និងវត្តទួលអណ្តែតក្នុងស្រុកជាំក្សាន្ត ក្នុងករណីអាសន្ន ឈានដល់ការផ្ទុះអាវុធ ៕
