ភ្នំពេញ៖ ជនសង្ស័យជនជាតិចិន២នាក់ ត្រូវបានកម្លាំអាវុធហត្ថក្រុងប៉ោយប៉ែតបញ្ជូនទៅតុលាការកាលពីថ្ងៃទី១១ខែមករាឆ្នាំ២០១៩ក្រោយប្រើហិង្សានិងចាប់ខ្លួនថៅកែកាស៊ីណូម្នាក់នៅប៉ោយប៉ែតញាត់ចូលក្នុងឡានយកទៅបង្ខាំងជម្រិតទារប្រាក់ចំនួន១លានដុល្លារ។
មន្រ្តីអាវុធហត្ថបានឲ្យដឹងថា ករណីចាប់ជម្រិតនេះបានកើតឡើងកាលពីថ្ងៃទី១០ ខែមករា ឆ្នាំ២០១៩ វេលាម៉ោង ១១ និង ០០នាទី នៅចំណុចកាស៊ីណូបូរីសានស៊ានហូ ស្ថិតក្នុងភូមិគីឡូត៍ម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត កម្លាំងមូលដ្ឋានកងរាជអាវុធហត្ថក្រុងប៉ោយប៉ែតចុះប្រតិបត្តិការបង្រ្កាបករណី ហិង្សាដោយចេតនា មានស្ថានទម្ងន់ទោស និងជម្រិតទារប្រាក់ ប្រព្រឹត្តកាលពីថ្ងៃទី៤ ខែមករា ឆ្នាំ២០១៩ និងឃាត់ខ្លួនជនសង្ស័យបានចំនួន២នាក់ ។
តាមការបំភ្លឺរបស់ជនរងគ្រោះឲ្យដឹងថាជនសង្ស័យទាំង ២នាក់ខាងលើ បានចូលមកដល់ក្នុងកាស៊ីណូ ហើយវាយទៅលើជនជាតិចិនដូចគ្នា បណ្តាលឲ្យឈ្មោះ Hoi kue រងរបួសជាទម្ងន់ កំពុងសម្រាកព្យាបាលនៅមន្ទីរពេទ្យប្រទេសថៃ និងជនរងគ្រោះ ២នាក់ទៀត រងរបួសស្រាល និងបានចាប់ថៅកែក្រៀកចូលឡាន ហើយគម្រាមថា ឲ្យយកប្រាក់ចំនួន១លានដុល្លារ មកលោះថៅកែទៅវិញ បើមិនយកប្រាក់មកលោះទេគេនឹងសម្លាប់ថៅកែចោល ពេលនោះជនរងគ្រោះ ២នាក់ដែលរងរបួសស្រាល បានបើករថយន្តដេញតាមរថយន្តជនសង្ស័យ ដើម្បីរំដោះថៅកែខ្លួនវិញពេលឃើញក្រុមខ្លួនដេញតាមជួយថៅកែបានលោតចេញពីរថយន្តរបស់ក្រុមជនសង្ស័យហើយឡើងរថយន្តរបស់ក្រុមជនរងគ្រោះដែលដេញតាមជួយជិះត្រឡប់មកកាស៊ីណូវិញចំណែកក្រុមជនសង្ស័យបានជិះរថយន្តគេចខ្លួនតាមផ្លូវជាតិលេខ៥ មិនដឹងទៅដល់ទីណានោះទេ៕
