ភ្នំពេញ៖ ពិធីបុណ្យទន្លេលើកទី៥ នឹងរៀបចំនៅនៅខេត្តកំពង់ឆ្នាំង ចាប់ពីថ្ងៃទី១៥-១៧ ខែមីនា ឆ្នាំ២០១៩ ខាងមុខនេះ ក្រោមប្រធានបទ «ទន្លេ ផ្សារភ្ជាប់សន្តិភាព ប្រជាជន និងទេសចរណ៍»។
ក្នុងកិច្ចប្រជុំត្រៀមរៀបចំពិធីបុណ្យទន្លេ នាថ្ងៃទី១០ ខែមករា ឆ្នាំ២០១៩ លោក ថោង ខុន រដ្ឋមន្ត្រីក្រសួងទេសចរណ៍ បានជំរុញឱ្យរដ្ឋបាលខេត្តកំពង់ឆ្នាំង ខិតខំបន្តរៀបចំរបៀបរៀបរយ សណ្តាប់ធ្នាប់អនាម័យសាធារណៈពិសេសក្នុងទីក្រុង និងតាមដងទន្លេឱ្យបានល្អ និងខិតខំចាប់យកឱកាសនៃបុណ្យទន្លេនេះ ពង្រីកការយល់ដឺងសាធារណៈក្នុងកិច្ចរក្សាការពារបរិស្ថាន ជីវចម្រុះតាមដងទន្លេ និងខិតខំពង្រីកការផ្សព្វផ្សាយពីគោលដៅទេសចរណ៍ឱ្យបានច្រើន។
លោកបានរដ្ឋមន្រ្តីបានជំរុញរដ្ឋបាលខេត្ត និងមន្ទីរទេសចរណ៍ មន្ទីរពាក់ព័ន្ធនានាក្នុងខេត្តត្រូវខិតខំចាប់យកឱកាសនៃការប្រារព្ធពិធីបុណ្យទន្លេលើកទី៥ ដើម្បីផ្សព្វផ្សាយលើកកម្ពស់ការយល់ដឺងសាធារណៈ អំពីភាពស្អាត និងបៃតង ថែរក្សាបរិស្ថានទន្លេ បរិស្ថានទីក្រុង លើកកម្ពស់គុណភាព ផលិលផល និងសេវាទេសចរណ៍ឱ្យបានល្អត្រូវខិតខំស្រាវជ្រាវនិងពង្រីកគោលដៅទេសចរណ៍ថ្មីៗ ឱ្យបានច្រើនសាកសមជាខេត្ត ដែលសម្បូរទៅដោយសក្តានុពលទេសចរណ៍ វប្បធម៌ ប្រវត្តិសាស្ត្រ ធម្មជាតិដ៏សម្បូរបែប ពិសេសទេសភាពតាមដងទន្លេ។
ក្រៅពីនេះ លោកថោង ខុន ក៏បានជំរុញឱ្យមន្ទីរទេសចរណ៍ខិតខំអភិវឌ្ឍន៍រមណីយដ្ឋានទេសចរណ៍ទាំងឡាយណា ដែលមិនទាន់មានការអភិវឌ្ឍ និងត្រូវរៀបចំរមណីយដ្ឋានទេសចរណ៍ផ្សេងទៀត ឱ្យកាន់តែមានភាពទាក់ទាញ ពិសេសត្រូវខិតខំកៀរគររកក្រុមហ៊ុនវិនិយោគលើវិស័យទេសចរណ៍ ដើម្បីបង្កើតផលិតផលទេសចរណ៍ថ្មីៗនៅក្នុងខេត្តបន្ថែមទៀត។
លោកក៏បានជំរុញឱ្យមានការយកចិត្តទុកដាក់ពីការពង្រឹងសន្តិសុខ សណ្ដាប់ធ្នាប់ សេវាម្ហូបអាហារ រមណីយដ្ឋានទេសចរណ៍ បង្គន់អនាម័យសាធារណៈ និងចល័ត បញ្ហាអនាម័យ បញ្ហាសំរាម តាមដងទន្លេ ទីផ្សារ ទីក្រុងស្អាត រមណីយដ្ឋានស្អាត និងត្រូវរៀបចំពិព័រណ៍ម្ហូបអាហារ ពិព័រណ៍ផលិតផលក្នុងស្រុក ព្រមទាំងត្រូវរៀបចំឱ្យបានល្អនូវកម្មវិធីសិល្បៈ ព្រឹត្តិការណ៍កីឡា និងពិធីផ្សេងៗ ពិសេសត្រូវត្រៀមទទួលស្វាគមន៍វត្តមានសម្ដេចតេជោនិងសម្តេចកិត្តិព្រឹទ្ធបណ្ឌិតឱ្យបានល្អ និងហ្មត់ចត់បំផុត៕
