ភ្នំពេញ៖ក្រសួងការងារនិងបណ្តុះបណ្តាលវិជ្ជាជីវៈបានធ្វើការសហការគ្នាជាមួយសមាគមគ្រឹះស្ថានឧត្តមសិក្សាកម្ពុជាដើម្បីធ្វើឲ្យប្រសើរឡើងលើការអភិវឌ្ឍន៍ផ្នែកធនធានមនុស្សបន្ថែមទៀត។
លោក អ៊ិត សំហេង បានលើកឡើងនៅថ្ងៃទី១១ ខែមករា ឆ្នាំ២០១៩នេះក្នុងឱកាសទទួលជួបសមាគមគ្រឹះស្ថានឧត្តមសិក្សាកម្ពុជា ដែលដឹកនាំដោយ លោក ហេង វ៉ាន់ដា ប្រធានសមាគម កាលពី២០ឆ្នាំមុន ឧត្តមសិក្សាស្ថិតក្នុងស្ថានភាពមួយនៅក្មេងខ្ចីនៅឡើយប៉ុន្តែក្នុងពេលបច្ចុប្បន្នមានការរីកចម្រើនគួរឱ្យកត់សម្គាល់និងមានវឌ្ឍនភាពច្រើនតាំងពីការចាប់ផ្តើមបរិមាណតិចតួចរហូតដល់គុណភាព។
លោករដ្ឋមន្ត្រីលើកឡើងថា កម្លាំងពលកកម្មជំនាញ និងបច្ចេកទេស ភាគច្រើនចេញពីគ្រឹះស្ថានឯកជន និងបានក្លាយជាប្រភពធនធានមនុស្សដ៏សំខាន់។
ក្រោយជំនួបនេះហើយ ភាគីសមាគម និងក្រសួងការងារ នឹងបញ្ជូនសមាសភាពរៀងៗខ្លួនដើម្បីបង្កើតក្រុមការងាររួមជំរុញឲ្យប្រសើរឡើងនូវការអភិវឌ្ឍន៍ផ្នែកធនធានមនុស្ស ស្របតាមយុទ្ធសាស្រ្តចតុកោណដំណាក់កាលទី៤នៃរាជរដ្ឋាភិបាលកម្ពុជានិងគោលនយោបាយនានាដូចជាគោលនយោបាយជាតិស្តីពីមុខរបរនិងការងារនិងគោលនយោបាយជាតិស្តីពីការអប់រំបណ្តុះបណ្តាលវិជ្ជាជីវៈ៕
