ភ្នំពេញ៖ទំនិញហួសកាលបរិច្ឆេទប្រើប្រាស់ និងខូចគុណភាពចម្រុះទម្ងន់ជាង ៥០គីឡូក្រាមដែលត្រូវបានអគ្គនាយកដ្ឋានកាំកុងត្រូលធ្វើការដកហូតនិងត្រៀមដុតកំទេចចោល នៅក្នុងពេលឆាប់ៗខាងមុខ។
មន្រ្តីអគ្គនាយកដ្ឋានកាំកុងត្រូល នៃក្រសួងពាណិជ្ជកម្មនៅថ្ងៃអង្គារ ទី៨ ខែមករា ឆ្នាំ២០១៩ បានបន្តប្រតិបត្តិការត្រួតពិនិត្យទំនិញ និងចុះប្រចាំការតាមបណ្តាទីផ្សារនានាទូទាំងប្រទេស ដើម្បីស្រាវជ្រាវ និងទប់ស្កាត់ទំនិញខូចគុណភាពព្រមទាំងស្វែងរកសារធាតុគីមីហាមឃាត់នៅក្នុងផលិតផលម្ហូបអាហារ ក្នុងគោលបំណងការពារអ្នកប្រើប្រាស់ ដោយទទួលបានលទ្ធផលដូចខាងក្រោម៖
១. សាខាកាំកុងត្រូលខេត្តកំពង់ឆ្នាំង, សាខាកាំកុងត្រូលខេត្តបាត់ដំបង, សាខាកាំកុងត្រូលតំបន់សេដ្ឋកិច្ចពិសេសភ្នំពេញ, សាខាកាំកុងត្រូលខេត្តព្រះសីហនុ និងសាខាកាំកុងត្រូលខេត្តកំពង់ចាម បានចុះត្រួតពិនិត្យសុវត្ថិភាពផលិតផលទំនិញម្ហូបអាហារ ខូចគុណភាព គ្មានស្លាកសញ្ញា គ្មានកាលបរិច្ឆេទ និងវេចខ្ចប់មិនត្រឹមត្រូវ នៅតាមផ្សារគោលដៅចំនួន ០៦។ ជាលទ្ធផល មន្ត្រីជំនាញបានរកឃើញ និងដកហូតទំនិញខូចគុណភាពចម្រុះសរុបចំនួន ៥០គីឡូក្រាម។
២. សាខាកាំកុងត្រូលរាជធានីភ្នំពេញ, សាខាកាំកុងត្រូលកំពង់ផែអន្តរជាតិភ្នំពេញ, សាខាកាំកុងត្រូលអាកាសយាន្ដដ្ឋានអន្តរជាតិភ្នំពេញ និងសាខាកាំកុងត្រូលតំបន់សេដ្ឋកិច្ចពិសេសភ្នំពេញ បានចុះប្រចាំការត្រួតពិនិត្យ ស្រាវជ្រាវ និងទប់ស្កាត់ទំនិញខូចគុណភាព និងស្វែងរកសារធាតុគីមីហាមឃាត់ នៅតាមផ្សារគោលដៅចំនួន ០៤។ ជាលទ្ធផល មន្ត្រីជំនាញបានរកឃើញ និងដកហូតទំនិញខូចគុណភាព និងហួសកាលបរិច្ឆេទប្រើប្រាស់មានដូចជា៖ ទឹកចាហួយកំប៉ុងម៉ាក Yeos ចំនួន ៣កំប៉ុង, តៅហ៊ូពងមាន់ ចំនួន ៣១ដុំ ស្មើនឹង ៣.៤១គីឡូក្រាម។
នៅក្នុងឱកាសនោះ មន្រ្តីជំនាញកាំកុងត្រូល បានណែនាំដល់អាជីវករទាំងអស់ ធ្វើការត្រួតពិនិត្យគុណភាពទំនិញឱ្យបានត្រឹមត្រូវ មុនពេលដាក់តាំងលក់ជាសាធាណៈ ជាពិសេសត្រូវពិនិត្យលើសំបកវេចខ្ចប់ ស្លាកសញ្ញា កាលបរិច្ឆេទផលិត និងផុតកំណត់ រួមទាំងអាសយដ្ឋានរបស់សហគ្រាស ឱ្យបានត្រឹមត្រូវ ដើម្បីចៀសវៀងបង្កផលប៉ះពាល់ ដល់សុខមាលភាពប្រជាពលរដ្ឋ និងភ្ញៀវទេសចរ ដែលចូលមកទេស្សនាកម្សាន្ត នៅក្នុងព្រះរាជាណាចក្រកម្ពុជា៕
