ភ្នំពេញ៖លោក វ៉ាង វិនធៀន (Wang Wentian) ឯកអគ្គរដ្ឋទូតចិន ដែលទើបតែងតាំងថ្មី ប្រចំាកម្ពុជា បានអះអាងថា ប្រទេសចិន និងកម្ពុជា ជាមិត្តល្អដែលមានការយោគយល់ និងគាំទ្រគ្នាទៅវិញទៅមកដូច្នេះចិននឹងបន្តគំាទ្រដល់ការអភិវឌ្ឍនៅកម្ពុជាតាម លទ្ធភាពរបស់ខ្លួនទៀត។
លោក វ៉ាង វិនធៀន បានលើកឡើងបែបនេះ នៅពេលចូលជួបសម្តែងការគួរសមជាមួយ សម្តេច ហេង សំរិន ប្រធានរដ្ឋសភា នាព្រឹកថ្ងៃទី២៤ ខែធ្នូ ឆ្នាំ២០១៨ វិមានរដ្ឋសភា។ នេះបើយោងតាមគេហទំព័ររដ្ឋសភាជាតិ។
សម្តេចប្រធានរដ្ឋសភា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ ស្ថានទូតចិន អតីតឯកអគ្គរដ្ឋទូតចិនមុនៗប្រចំាកម្ពុជា ក្នុងកិច្ចការទំនាក់ទំនង ពង្រឹងពង្រីកកិច្ចសហប្រតិបត្តិការលើគ្រប់វិស័យ។ ឆ្នាំ២០១៨នេះ ជាឆ្នាំខួបទី៦០ នៃទំនាក់ទំនងការទូតជាប្រវត្តិសាស្រ្តរវាងកម្ពុជា-ចិន ដែលបានកសាងឡើងដោយ អតីតព្រះមហាវីរក្សត្រ ព្រះបរមរតនកោដ្ឋ នរោត្តម សីហនុ និងអតីតប្រមុខដឹកនាំមហាប្រទេសចិន។
សម្តេចបានគូសបញ្ជាក់ថាចាប់ពីឆ្នាំ២០១០មកទំនាក់ទំនងប្រទេសទំាងពីរបានឈានដល់កម្រិតជាប្រវត្តិសាស្រ្តមួយគឺកិច្ចសហប្រតិបត្តិការ ភាពជាដៃគូយុទ្ធសាស្រ្តគ្រប់ជ្រុងជ្រោយ ដែលបានកំពុងផ្តល់ផ្លែផ្កាជាក់ស្តែងលើគ្រប់វិស័យដល់សង្គមជាតិទាំងពីរ។
ជាការឆ្លើយតបលោក វ៉ាង វិនធៀន បានលើកឡើងថា ទំនាក់ទំនងកម្ពុជា ជាទំនាក់ទំនងអ្នកជិតខាង ជាទំនាក់ទំនងបងប្អូនមិត្តភក្តិយ៉ាងជិតស្និទ្ធ គោរព យោគយល់និងបានគំាទ្រគ្នាទៅវិញទៅមក។ប្រទេសចិនបានគំាទ្រដល់ការសម្រេចចិត្តរបស់កម្ពុជា គោរពបូរណភាពទឹកដី និងឯករាជ្យភាពរបស់ កម្ពុជា។
លោកទូត បានអះអាងថាលោកធ្លាប់បានមកទស្សនកិច្ចនៅកម្ពុជាក្នុងឆ្នាំ២០០០។ រយៈពេល១៨ឆ្នាំកន្លងមកនេះលោកបាន សង្កេតឃើញថា កម្ពុជាមានការអភិវឌ្ឍគួរឲ្យកត់សម្គាល់ ក្រោមម្លប់ព្រះមហាក្សត្រ និងថ្នាក់ដឹកនាំរាជរដ្ឋាភិបាល ព្រមទំាងសភា ដែលធ្វើឲ្យកម្ពុជា មានសុខសន្តិភាព។ សន្តិភាព និងការអភិវឌ្ឍបែបនេះ បានឆ្លុះបញ្ចំាងឲ្យឃើញនូវលទ្ធផលនៃការបោះឆ្នោតជ្រើសតំាងសមាជិករដ្ឋសភានីតិកាលទី៦ ដែលជាការសម្រេចចិត្តរបស់ពលរដ្ឋ។
សម្តេចហេង សំរិន មានជំនឿយ៉ាងមុតមាំថា ក្នុងអាណត្តិការទូតរបស់ឯកឧត្តមនឹងបន្តសហការជាមួយបណ្តាក្រសួង មន្ទីរ ស្ថាប័ននានា នៃព្រះរាជាណាចក្រកម្ពុជា ដើម្បីធ្វើយ៉ាងណាឲ្យស្មារតីមិត្តភាព សាមគ្គីភាព និងកិច្ចសហប្រតិបត្តិការវាងកម្ពុជា-ចិននេះ កាន់តែល្អប្រសើរ និងស៊ីជម្រៅថែមទៀត។ ចំណែករដ្ឋសភាកម្ពុជាត្រៀមខ្លួនជាស្រេច ដើម្បីធ្វើកិច្ចសហការពេញលេញ ដើម្បីឲ្យបេសកកម្មការទូតរបស់លោកនៅកម្ពុជាទទួលបានជោគជ័យ ៕
