ភ្នំពេញ ៖ ក្នុងឆ្នាំ២០១៨ ក្រសួងរៀបចំដែនដី នគរូបនីយកម្ម និងសំណង់ បានប្រមូលចំណូលចូលជាតិសរុបប្រមាណ ៣៩០ ៤៧៦ ៤៤២ ៧១១ រៀល គិតទាំងចំណូលបានពីការផ្ទេរអចលនទ្រព្យផងដែរ។
យោងតាមរបាយការណ៍បូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩របស់ ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី២៤ ខែធ្នូ ឆ្នាំ២០១៨ បានឲ្យដឹងថា ចំណូលថវិកាចូលជាតិរួមមាន៖ចំណូលពីសេវាសុរិយោដីចំនួន ៤៦ ១១៨ ៤៦៧ ៦០១ រៀល , ចំណូលពីសេវាសំណង់ចំនួន ១៦ ២០៨ ៣៦៦ ៨៦៨ រៀល , ចំណូលពីការជួលទីតាំងរោងចក្រសហគ្រាស មានចំនួន ២៨១ ៦៤៨ ៨៨៨ រៀល , ចំណូលពីពន្ធលើការផ្ទេរអចលនទ្រព្យប្រមូលនៅអង្គភាពពន្ធដារចំនួន ៣២៧ ៨៦៧ ៩៥៩ ៣៥៤ រៀល។
របាយការណ៍ដដែលបានឲ្យដឹងថាចំណូលទទួលបានពីការផ្តល់សេវានៅការិយាល័យច្រកចេញចូលតែមួយសរុប ៧៨ ៥១៧ ៦៧១ ២៤៧ រៀល ក្នុងនោះសេវានៅថ្នាក់កណ្តាលចំនួន ១១ ១២៧ ៦៨៥ ២៦៨ រៀល និងថ្នាក់រាជធានី-ខេត្តចំនួន ៦៧ ៣៨៩ ៩៨៥ ៩៧៩ រៀល៕
