មន្រ្តីជាន់ខ្ពស់នៃរដ្ឋបាលខេត្តបន្ទាយមានជ័យ និងមន្រ្តីការទូតនៃប្រទេសថៃ បានយល់ស្របគ្នាក្នុងការធ្វើសកម្មភាពនានាបម្រើឱ្យវិស័យទេសចរណ៍នៃប្រទេសទាំងពីរដែលមានព្រំដែនជាប់គ្នា ពិសេសគឺលំហូរភ្ញៀវឆ្លងកាត់ច្រកព្រំដែនអន្តរជាតិនៃប្រទេសទាំងពីរ។
ក្នុងកិច្ចប្រជុំកាលពីថ្ងៃទី១៧ ខែមីនា ឆ្នាំ២០២៥ រវាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ ជាមួយឯកឧត្តម ទុល ត្រៃសូរ៉ាត់ ( Tull TRAISORAT )ឯកអគ្គរាជទូតថៃប្រចាំកម្ពុជា បានលើកឡើងពីសារសំខាន់នៃវិស័យទេសចរណ៍ និងពាណិជ្ជកម្ម ។មន្រ្តីនៃប្រទេសទាំងពីរបានយល់ដូចគ្នាថា វិស័យទេសចរណ៍ជាវិស័យអាទិភាព ខណៈតួលេខប្រចាំឆ្នាំនៃលំហូរជនជាតិថៃ និងអន្តរជាតិដែលបានឆ្លងចេញ-ចូលប្រទេសថៃ និងកម្ពុជាតាមច្រកទ្វារព្រំដែនអន្តរជាតិរវាង ប្រទេសទាំងពីរមានប្រមាណជាង២លាននាក់ ។មន្រ្តីកម្ពុជា ថៃ បានបញ្ជាក់នូវអនុវត្តគោលដៅរួម គឺជំរុញកំណើនភ្ញៀវពី៣លានទៅ៤លាននាក់។
សូមជម្រាបថា បន្ទាយមានជ័យ ជាខេត្តភាគខាងលិចប្រទេស ដែលមានព្រំដែនជាប់នឹងប្រទេសថៃ ។ជាការកត់សម្គាល់បន្ទាយមានជ័យ ជាខេត្តមានតំបន់ទេសចរណ៍ច្រើនគួរសម ហើយក៏ជាខេត្តតភ្ជាប់ទៅកាន់តំបន់អង្គរខេត្តសៀមរាបផងដែរ ។ ខែមករាកន្លងទៅច្រកអន្តរជាតិប៉ោយប៉ែតមានភ្ញៀវអន្តរជាតិចូលតាមច្រកនេះចំនួន១៨៣.៦៣៩នាក់ និងភ្ញៀវទេសចរចេញចំនួន១៨៦.២២១នាក់។
ឯកឧត្ដម ទុល ត្រៃសូរ៉ាត់ ឯកអគ្គរាជទូតថៃ បានបញ្ជាក់ពីទិសដៅរួមគ្នានេះ ពីព្រោះវិស័យទេសចរណ៍ក៏ជាផ្នែកមួយយ៉ាងសំខាន់ជំរុញដល់វិស័យពាណិជ្ជកម្មផងដែរ ខណៈឯកឧត្តម អ៊ុំ រាត្រី បញ្ជាក់ថា វិស័យទេសចរណ៍ ជាឧស្សាហកម្មគ្មានផ្សែង ហើយក៏ជាប្រភពចំណូលថវិកាជាតិយ៉ាងសំខាន់។
សូមបញ្ជាក់ថា នៅខេត្តបន្ទាយមានជ័យ ឯកឧត្តមឯកអគ្គរាជទូតថៃប្រចាំកម្ពុជា ក៏បានទស្សនកិច្ចនៅរោងចក្ររបស់ ក្រុមហ៊ុន ធី.ខេ ហ្គាមេន ស៊ីសុផុន ចំកាត់ ដែលមានទីតាំងស្ថិតនៅ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ផងដែរ៕
