ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសរំលេចថា ក្នុងឆ្នាំ២០២៤កន្លងទៅវិស័យឧស្សាកម្មនៅកម្ពុជាបានរួមចំណែកដល់កំណើនសេដ្ឋកិច្ចប្រមាណ ៨,៥ភាគរយនិងព្យាករថាមានកំណើនប្រមាណ ៨,៦ភាគរយនៅក្នុងឆ្នាំ២០២៥។
ក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆាំ្ន២០២៥ របស់ក្រសួងនៅព្រឹកថ្ងៃទី២៥ ខែកុម្ភៈ ឆ្នាំ២០២៥នេះនាសណ្ឋាគាររ៉េស៊ីដង់ សុខាភ្នំពេញ ឯកឧត្តមរដ្ឋមន្រ្តីបានលើកឡើងទៀតថា លទ្ធផលនេះបានបង្ហាញអំពីការខិតខំចំទិសដៅរបស់ក្រសួង ដោយអនុវត្តយ៉ាងខ្ជាប់ខ្ជួននូវកម្មវិធីនយោបាយនិងយុទ្ធសាស្ត្ររបស់រាជរដ្ឋាភិបាល ក្នុងការអភិវឌ្ឍវិស័យឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដើម្បីរួមចំណែកធានាចីរភាពនៃកំណើនសេដ្ឋកិច្ច និងពង្រីកសក្តានុពល ព្រមទាំងប្រសិទ្ធភាពសេដ្ឋកិច្ចជាអតិបរមា។ ជាពិសេសការបង្កើនតម្លៃបន្ថែមសេដ្ឋកិច្ចលើវិស័យឧស្សាហកម្ម សហគ្រាសធុនតូចនិងមធ្យម និងការវិនិយោគលើហេដ្ឋារចនាសម្ព័ន្ធគុណភាពជាតិ ដែលជាចំណែកមួយនៃការទ្រទ្រង់សមត្ថភាពប្រកួតប្រជែងរបស់កម្ពុជា។
ក្នុងពិធីបើកសន្និបាតដដែល ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម បានបង្ហាញចំណុចខ្លាំងរបស់កម្ពុជា ក្នុងនោះវិស័យឧស្សាហកម្មនៅកម្ពុជាផងដែរ គឺការដឹកនាំ និងចង្អុលទិស។ឯកឧត្តមប្រាប់ដល់សមាជិក សមាជិកាអង្គសន្និបាតថា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា កម្ពុជានៅតែអាចរក្សាបាននូវស្ថិរភាពម៉ាក្រូសេដ្ឋកិច្ច ធានាបានអត្រាមានការងារធ្វើខ្ពស់ ទាក់ទាញការ វិនិយោគ និងបង្កើតរោងចក្រ និងសហគ្រាសជាបន្តបន្ទាប់ ក្នុងគោលដៅធានាបានកំណើននៃការនាំចេញ ជាពិសេសការដាក់ចេញវិធានការដ៏មុតស្រួចជាបន្តបន្ទាប់របស់ប្រមុខរាជរដ្ឋាភិបាល ក្នុងការជួយដល់សហគ្រាសធុនតូចនិងមធ្យម ដែលជាឆ្អឹងខ្នងនៃកំណើនសេដ្ឋកិច្ចជាតិ ដើម្បីរក្សាបានដំណើរការផលិតកម្ម ធុរកិច្ច និងការវិនិយោគនានា ក៏ដូចជារក្សាបានការងារធ្វើជូនប្រជាកសិករ និងកម្មករ-កម្មការិនី។
សូមជម្រាបថា ក្នុងឱកាសនេះឯកឧត្តមរដ្ឋមន្រ្តីបានបង្ហាញនូវការវាយតម្លៃចុងក្រោយសេដ្ឋកិច្ចកម្ពុជាដោយអ្នកជំនាញថា កម្ពុជាបន្តសម្រេចបានកំណើនក្នុងរង្វង់ ៦ភាគរយក្នុងឆ្នាំ២០២៤ និងរង្វង់៦,៣ភាគរយក្នុងឆ្នាំ២០២៥។ទន្ទឹមនេះតាមការព្យាកររបស់អ្នកជំនាញសេដ្ឋកិច្ចសកលក្នុងឆ្នាំ២០២៤កន្លងទៅមានកំណើនក្នុងរង្វង់ ៣,២% នៃផលិតផលក្នុងស្រុកសរុប(ផ.ស.ស./GDP) សហរដ្ឋអាមេរិក ២,៨ភាគរយ, ចិន ៤,៨ភាគរយ, តំបន់ចាយប្រាក់អឺរ៉ូ ០,៨ភាគរយ និងតំបន់អាស៊ាន ៤,៥ភាគរយ។
ដោយឡែកសម្រាប់ឆ្នាំ២០២៥ សេដ្ឋកិច្ចសកលត្រូវបានព្យាករថា នឹងងើបឡើងវិញបន្តិច ប៉ុន្តែក្នុងល្បឿនយឺត ក្នុងរង្វង់ ៣,៣ភាគរយនៃ ផ.ស.ស. គាំទ្រដោយការរក្សាបាននូវចលនាការកំណើនរបស់ប្រទេសអភិវឌ្ឍន៍ និងប្រទេសកំពុងអភិវឌ្ឍន៍ ដែលជាលទ្ធផលនៃការបន្ធូរបន្ថយគោលនយោបាយការរឹតបន្តឹងរូបិយវត្ថុ, ការបន្តគាំទ្រដល់ការប្រើប្រាស់ ការវិនិយោគនិងការនាំចេញ ក្នុងនោះ សេដ្ឋកិច្ចសហរដ្ឋអាមេរិកនឹងមានកំណើន ២,៧ភាគរយនៃផ.ស.ស., ចិន ៤,៦ភាគរយ, តំបន់ចាយប្រាក់អឺរ៉ូ ១ភាគរយ និងតំបន់ អាស៊ាន ៤,៦ភាគរយ៕
