ជាមួយរូបថតជាច្រើនសន្លឹកដែលលោកបញ្ជាក់ថា “រូបភាពពីបរទេស” ឯកឧត្តម ហេង រតនា ប្រតិភូរាជរដ្ឋាភិបាលទទទួលបន្ទុកអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា ឬហៅកាត់ថា ស៊ីម៉ាក់ (CMAC)បានសរសេរអត្ថបទខ្លីមួយទាក់ទងនឹងសង្រ្គាមរវាងប្រទេសអ៊ុយក្រែន និងរុស្ស៊ី គំរប់បីឆ្នាំគិតត្រឹមថ្ងៃទី២៤ ខែកុម្ភៈ ឆ្នាំ២០២៥នេះ។
លើបណ្ដាញសង្គមហ្វេសប៊ុកឯកឧត្តម ហេង រតនា រៀបរាប់យ៉ាងដូច្នេះថា “ថ្ងៃទី២៤ ខែកុម្ភៈ ឆ្នាំ២០២៥នេះ ជាខួបគំរប់៣ឆ្នាំនៃការចាប់ផ្តើមសង្គ្រាមអ៊ុយក្រែន-រុស្ស៊ី ពោលគឺកាលពីថ្ងៃទី២៤ ខែកុម្ភៈ ឆ្នាំ២០២២ រុស្ស៊ីបានបញ្ជូនកងទ័ពចូលទឹកដីអ៊ុយក្រែន!!”។
លោកបន្តថា សង្គ្រាមបាននិងកំពុងបំផ្លិចបំផ្លាញអ្វីៗគ្រប់យ៉ាងរបស់អ៊ុយក្រែន និងផ្នែកខ្លះរបស់រុស្ស៊ី ។មនុស្សរាប់សែននាក់បានស្លាប់។ ប្រជាជនអ៊ុយក្រែនចំនួនជាង៨.៥លាននាក់ក្លាយជាជនភៀសខ្លួនទៅក្រៅប្រទេស ជាពិសេសប្រទេសអឺរ៉ុបដែលទទួលជនភៀសខ្លួនច្រើនជាងសម័យសង្គ្រាមលោកលើកទី២ទៅទៀតនិងមានប្រជាជនជាង៨លាននាក់ជាជនភៀសខ្លួនក្នុងប្រទេស។
អគារធំតូច ទីធ្លាសាធារណៈ រោងចក្រ ប្រពន្ធ័អគ្គិសនី-ទឹកស្អាត ស្ពាន ផ្លូវថ្នល់ …ត្រូវបានបំផ្លិចបំផ្លាញស្ទើគ្មានសល់។ ដីព្រៃភ្នំ បរិស្ថានស្រែចម្ការ ក្លាយជាទីលានសមរភូមិ ចម្ការមីន…!! ។
ឯកឧត្តមបានរំលឹកថា “យុវជនអ៊ុយក្រែនធ្លាប់តែលឺសំឡេងស្រែកសប្បាយអបអរសាទរកីឡាបាល់ទាត់ កីឡាប្រដាល់…ដ៏អស្ចារ្យរបស់ជាតិសាសន៍ខ្លួន បានប្រែក្លាយលឺតែសំឡេងគ្រាប់បែក គ្រាប់កាំជ្រួច ដ្រូនទម្លាក់គ្រាប់បែក…។
ជាមួយសំឡេងយំស្រែកទឹកភ្នែកឥតល្ហែ តើសន្តិភាពនៅឯណា? ពេលណាទើបត្រឡប់មកវិញ”។
តើការបាត់បង់បំផ្លិចបំផ្លាញត្រូវការពេលវេលាយូរប៉ុណ្ណាទើបស្តារឡើងវិញបាន? អ្នកណាជាអ្នកទទួលខុសត្រូវ?។ ការបំផ្លិចបំផ្លាញដោយសង្គ្រាមក្នុងរយៈពេល៣ឆ្នាំ តែការកសាងអាចត្រូវការពេលវេលារាប់ទសវត្សរ៍។
នៅចុងបញ្ចប់នៃសំណេរឯកឧត្តមបានគូសរំលេចថា “ស្គាល់នូវសោកវិនាសកម្មនៃសង្គ្រាម ទើបយល់ដឹងពីតម្លៃមហាសាលនៃសន្តិភាព!!”៕
