ស្វាយរៀង៖ ឯកឧត្តម ប៉េង ពោធិ៍សា អភិបាលខេត្តស្វាយរៀងនៅរសៀលថ្ងៃទី៤ ខែកុម្ភៈ ឆ្នាំ២០២៥បានអញ្ជើញពិនិត្យការងារមួយចំនួននៅស្រុករមាសហែក ។
ប្រភពរដ្ឋបាលខេត្តបានបញ្ជាក់ថា ឯកឧត្តមអភិបាលខេត្ត រួមជាមួយមន្រ្តីពាក់ព័ន្ធបានអញ្ជើញ ពិនិត្យគម្រោងសាងសង់ផ្ទះគ្រួសារអតីតយុទ្ធជនជំហានទី៣ បន្ថែមនៅទីតាំងដីផ្ទះ៤០០ខ្នង ស្ថិតនៅភូមិជីកដី ឃុំអណ្តូងត្របែក ស្រុករមាសហែក ដែលកំពុងធ្វើការសាងសង់បន្ថែមចំនួន៩០ខ្នងផ្ទះ។ ពិនិត្យការស្ថាបនាផ្លូវកៅស៊ូ DBST ប្រវែង១១.៨៦ គីឡូម៉ែត្រ រយៈពេលសាងសង់ចំនួន១២ខែ ដែលតភ្ជាប់ពីភូមិអំពិល ឃុំអំពិល ទៅដល់ភូមិតាវាំង ឃុំគគី ស្រុករមាសហែក ដែលជាគម្រោងរបស់ក្រួងអភិវឌ្ឍន៍ជនបទ អនុវត្តដោយក្រុមហ៊ុន Shanghai Construction Group Co., Ltd ។
ឯកឧត្តមក៏បានអញ្ជើញទៅពិនិត្យការបូមទឹកជូនប្រជាពលរដ្ឋក្នុងការបង្កើនផលស្រូវរដូវប្រាំង នៅប្រឡាយកីយចក ត្រង់ចំណុចក្បាលហុង ស្ថិតនៅភូមិដក់ព ឃុំជ្រៃធំ ស្រុករមាសហែក ៕
