ព្រះសីហនុ៖ បន្ទាប់ពីបានចូលសំចត និងបំពេញទស្សនកិច្ចជាផ្លូវការនៅព្រះរាជាណាចក្រកម្ពុជា រយ:ពេល៣ថ្ងៃរួចមក កាលពីរសៀលថ្ងៃសៅរ៍ ទី១៤ ខែធ្នូ ឆ្នាំ២០២៤នេះ នាវាកងទ័ពជើងទឹកកូរ៉េខាងត្បូងចំនួន០១គ្រឿង ឈ្មោះ Wang Geon Destroyer (DDH-978) ដឹកនាំដោយវរនាវីឯក Chio Jong Soo មេបញ្ជាការនាវា បានដឹកនាំនាវាធ្វើដំណើរចាកចេញពីដែនសមុទ្រកម្ពុជា ប្រកបដោយសុវត្ថិភាព ឆ្ពោះទៅប្រទេសកូរ៉េ វិញដោយមានការជូនដំណើរនិវត្តន៍ ពីនាយ នាយរងមូលដ្ឋានសមុទ្រ ដឹកនាំដោយលោកវរនាវីឯក មាន សាវឿន មេបញ្ចាការរងកងទ័ពជើងទឹកមូលដ្ឋានសមុទ្ររាម នៅកំពង់ផែស្វយ័តក្រុងព្រះសីហនុ។
ដំណើរបំពេញទស្សនកិច្ចរបស់នាវាកងទ័ពជើងទឹកកូរ៉េខាងត្បូង នៅព្រះរាជាណាចក្រកម្ពុជារយៈពេល ៣ថ្ងៃ ក្នុងគោលបំណង បង្កើតទំនាក់ទំនងការទូតជាផ្លូវការ ក្នុងការដំឡើងកម្រិតទំនាក់ទំនងរវាងប្រទេសទាំងពីរទៅជាភាពជាដៃគូរយុទ្ធសាស្ត្រ ពង្រីកពាណិជ្ជកម្មទ្វេភាគី និងកិច្ចសហប្រតិបត្តិការលើវិស័យផ្សេងទៀតរួមមាន កិច្ចសហប្រតិ បត្តិការនយោបាយ សន្តិសុខ ការពារជាតិ សេដ្ឋកិច្ច ហិរញ្ញវត្ថុ វប្បធម៌ បរិស្ថាន និងកិច្ចសហប្រតិបត្តិការក្នុងតំបន់ និងអន្តជាតិ។
ក្នុងអំឡុងស្នាក់នៅធ្វើទស្សនកិច្ចរយ:ពេល ៣ថ្ងៃនៅកម្ពុជា គណ:ប្រតិភូកងទ័ពជើងទឹកកូរ៉េខាងត្បូងបានចូលជួបសម្តែងការគួសម និងពិភាក្សាការងាជាមួយរដ្ឋបាលខេត្តព្រះ សីហនុ មេបញ្ចាការមូលដ្ឋានសមុទ្រ និងថ្នាក់ដឹកនាំក្រសួងការពារជាតិផងដែរ។
លក្ខណៈបច្ចេកទេសនាវា Wang Geon Destroyer (DDH-978) បណ្តោយ ១៤៩,៥ម៉ែត្រ ទទឹង ១៧,៤ម៉ែត្រ កម្ពស់ ៣៩,២៤ម៉ែត្រ ជម្រៅទឹក ៧,៣ម៉ែត្រ និងមានទម្ងន់ផ្ទុក ៥៥៨២តោន ល្បឿន ៣០kts ដឹកនាំដោយមេបញ្ជាការនាវា លោកវរនាវីឯក Chio Jong Soo។
សូមបញ្ជាក់ថា ក្នុងឆ្នាំ២០២៤នេះ ខេត្តព្រះសីហនុ ទទួលនាវាយោធាបរទេសចូលចត ធ្វើទស្សនកិច្ចមានចំនួន០៩លើក ក្នុងនោះ នាវាកងទ័ពជើងទឹក ជប៉ុន ថៃ វៀតណាម ចិន ឥណ្ឌូនេស៊ី ចក្រភពអង់គ្លេស និងកូរ៉េខាងត្បូង៕
