ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រមានប្រសាសន៍ថា យើងត្រូវចាប់ឱកាសឱ្យជាប់ជាមួយវិស័យឯកជនដែលគេបានមកស្វែងយល់ពីការវិនិយោគនៅកម្ពុជា តាមរយៈការបង្កើតទំនាក់ទំនងរវាងវិស័យឯកជនជាមួយនឹងក្រសួងស្ថាប័ន ដែលយើងអាចផ្តល់ជាព័ត៌មាន ផ្តល់ជាចម្លើយចំពោះអ្វីដែលពួកគាត់ចង់ដឹង ជាពិសេសគឺការភ្ជាប់រវាងវិស័យឯកជន និងវិស័យឯកជន ដែលនេះគឺជាកិច្ចការមួយដ៏ល្អនៅក្នុងការទំនាក់ទំនងនៅលើវិស័យពាណិជ្ជកម្ម។ ការលើកឡើងរបស់សម្តេចនាយករដ្ឋមន្ត្រីដូចនេះធ្វើឡើងក្នុងពិធីបើកពិព័រណ៍ពាណិជ្ជកម្មកម្ពុជា នៅមជ្ឈមណ្ឌលភីអេច ហ្គ្រេនហល បុរីប៉េងហួត បឹងស្នោរ រាជធានីភ្នំពេញ នាព្រឹកថ្ងៃទី១៣ ខែធ្នូ ឆ្នាំ២០២៤នេះ។
សម្តេចធិបតីនាយករដ្ឋមន្ត្រីបានបញ្ជាក់ថា សម្តេចតែងបានយកចិត្តទុកដាក់ទៅលើកិច្ចការខាងលើនេះ ដោយសម្តេចបានណែនាំថា វិស័យឯកជនរបស់យើងនៅពេលចេញទៅក្រៅប្រទេសសូមកុំភ្លេចការធ្វើ ទំនាក់ទំនងជាមួយវិស័យឯកជននៅក្រៅប្រទេស ខណៈដែលរាជរដ្ឋាភិបាលមានឱកាសត្រឹមតែបង្ហាញ និងរៀបចំតែប៉ុណ្ណោះ តែសំខាន់នៅត្រង់ថា វិស័យឯកជនខ្លួនឯងជាអ្នកត្រូវធ្វើទំនាក់ទំនងជាមួយគ្នា។ សម្តេចធិបតីបានបន្ថែមថា យើងកំពុងតែជំរុញនូវបេសកកម្មខាងពាណិជ្ជកម្ម ទេសចរណ៍យ៉ាងសកម្ម ដោយការភ្ជាប់ទំនាក់ទំនងទាំងក្នុង និងក្រៅប្រទេសនៅលើគ្រប់វិស័យទាំងអស់ យើងត្រូវតែធ្វើ យើងត្រូវតែចូលរួមក្នុងការផ្សព្វផ្សាយពីកម្ពុជាអំពីអ្វីដែលយើងមាន ព្រោះការផ្សព្វផ្សាយគឺជាកិច្ចការសំខាន់ខ្លាំង ណាស់ ដោយយើងនឹងរៀបចំជាសៀវភៅវិនិយោគផ្សេងៗដើម្បីផ្តល់ជូនអ្នកដែលបានមកសិក្សាពី ឱកាសនៃការវិនិយោគនៅកម្ពុជា ព្រោះសៀវភៅនេះវាជាការផ្តល់ព័ត៌មានដ៏សំខាន់សម្រាប់អ្នកវិនិយោគ ក្នុងនោះក្រុមប្រឹក្សាអភិវឌ្ឍន៍កម្ពុជាក៏បានយកចិត្តទុកដាក់លើការងារនេះរួចហើយ តែយើងក៏ត្រូវតែធ្វើ បន្ថែមទៀតសម្រាប់ការផ្សព្វផ្សាយឱ្យបានកាន់តែច្រើនអំពីការវិនិយោគរបស់យើង៕
