ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា ក្នុងការរៀបចំធ្វើផែនការអ្វីមួយ ត្រូវតែចេះប្រើប្រាស់វិធីសាស្ត្រ ផែនការដើរថយក្រោយ ពោលដាក់ទិសដៅដែលចង់បាន ហើយកែសម្រួលបទដ្ឋានគតិយុត្តតាមក្រោយ ពោលគឺមិនត្រូវឱ្យឯកសារចងជើងខ្លួនឯង ត្រូវធ្វើជាអ្នកតម្រង់ទិសឯកសារ។
ការលើកឡើងរបស់សម្តេចបវរធិបតីនាយករដ្ឋមន្ត្រី ខាងលើនេះ បន្ទាប់ពីមានផែនការមួយចំនួន ត្រូវបានរាំងស្ទះដោយសារតែ បញ្ហាបទដ្ឋានគិតិយុត្ត ដែលស្របទៅនឹងស្ថានភាពកាលពីអតីតកាល តែមានការប្រែប្រួលមិនស៊ីសង្វាក់ នឹងពេលវេលាបច្ចុប្បន្ន។
ក្នុងពិធីបើកពិព័រណ៍ពាណិជ្ជកម្មកម្ពុជា លើកទី១៧ នៅមជ្ឈមណ្ឌលភីអេច ហ្គ្រេនហល បុរីប៉េងហួត បឹងស្នោ រាជធានីភ្នំពេញ នាព្រឹកថ្ងៃទី១៣ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត មានប្រសាសន៍ថា “គេថាការធ្វើផែនការ ដើរថយក្រោយ បានន័យថា យកគោលដៅដែលយើងចង់បាន លទ្ធផលដែលយើងចង់បានដាក់មុខ ហើយចាំយើងគូសវាសផ្លូវទៅវិញ កុំអង្គុយគិតផែនការ គិតអីនៅក្នុងបន្ទប់ហើយ បានចេញទៅ ថាដើរទៅណា ទៅដៅទៅ ថាយើងចង់បានសម្រួលនៅក្នុងការពាណិជ្ជកម្មហ្នឹងយ៉ាងម៉េច” ។
ក្នុងនោះសម្តេចធិបតី បានគូសបញ្ជាក់បន្ថែមថា “ការធ្វើ E-commerce ចង់ឱ្យបានយ៉ាងម៉េចក្នុង Logistic នឹង ហើយយើងដើរថយក្រោយវិញ ហើយចាំយើងកែសម្រួលបទដ្ឋានគតិយុត្ត ព្រោះលិខិតបទដ្ឋានគតិយុត្ត ជួនកាលយើងតែងតាំង រៀបតាក់តែង១០ទៅ២០ឆ្នាំហើយ វាអត់ស្រប រឿងនឹងហើយដែលយើងឱ្យកែសម្រួល នៅតំបន់អង្គរវត្តដើម្បីកែសម្រួល យើងរៀបចំ៣០នៃគោលការណ៍ ឥឡូវយើងត្រូវមើលទិដ្ឋភាពដែលយើងចង់បាន បច្ចុប្បន្ននិងទៅអនាគតយ៉ាងមិច រវាងការអភិរក្ស និងការអភិវឌ្ឍ យើងយកអានឹងមកបានមើល ហើយកែសម្រួលការកំណត់តំបន់ប្រើប្រាស់” ។
សម្តេចនាយករដ្ឋមន្ត្រី បន្ថែមថា “ទាក់ទងទៅនឹងចំណុចទី៤នេះ គឺខ្ញុំសូមឱ្យក្រសួងពាណិជ្ជកម្ម ពិនិត្យឡើងវិញ នូវរាល់ច្បាប់និងលិខិគតិយុត្ត ដែលបានធ្វើហើយ យើងបន្តធ្វើទៅទៀត ហើយនេះគឺការកំណែទម្រង់ដើម្បីធ្វើឱ្យកាន់តែមានប្រសិទ្ធភាព ហើយកុំឱ្យឯកសារចងយើង យើងជាអ្នកតម្រង់ទិសឯកសារ ព្រោះបទដ្ឋានគិតិយុត្ត គឺដើម្បីជួយឱ្យលើកកម្ពស់នូវសកម្មភាព និងលទ្ធផល ប្រសិទ្ធភាពលទ្ធភាព បើចឹងការកែសម្រួលត្រូវប្រើ”៕
