ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក សុង ហុង និងលោក ខូវ គួង អគ្គនាយករងនៃរដ្ឋបាលជលផល ចាប់ពីថ្ងៃទី២៨ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០២៤ បានដឹកនាំកម្លាំងសមត្ថកិច្ចចម្រុះ ចូលរួមដោយរដ្ឋបាលជលផល អធិការដ្ឋានរដ្ឋបាលជលផលខាងត្បូងបឹង ខាងជើងបឹងទន្លេសាប ខណ្ឌរដ្ឋបាលជលផលកំពង់ឆ្នាំង ពោធិ៍សាត់ បាត់ដំបង សៀមរាប និងកំពង់ធំ ។
ជាលទ្ធផល កម្លាំងសមត្ថកិច្ចចម្រុះបានរុះរើឧបករណ៍លបរាវ ឬលបឡុក រួមផ្សំជាមួយរបាំងសាច់អួន ដែលខុសទំហំក្រឡា លើសប្រវែងកំណត់ ឬរាំងស្ទះចរាចរណ៍ត្រីនៅតំបន់កបឹង បានចំនួន៦៨របាំង មានប្រវែងសរុបប្រមាណ ១៨ ១៤០ ម៉ែត្រ លូកងសាច់អួន និងលូស្បៃមុង៨៥មាត់ បង្គោល៤៣៨៧ដើម ឈ្នក់រួមផ្សំជាមួយភ្លើង១វង់ ឧបករណ៍ឆក់ត្រី១គ្រឿង និងចាក់លែងត្រីចម្រុះប្រមាណ៩៩០គីឡូក្រាម។
ក្នុងប្រតិបត្តិការនោះក៏មានការចូលរួមពី កងរាជអាវុធហត្ថ ក្រុមការងារអន្តរាគមន៍ថ្នាក់ជាតិបង្ក្រាបបទល្មើសជលផលប្រចាំកន្លែងអភិរក្សជលផលជ្រោយស្តី និងកំពង់ភ្លុក សរុបចំនួន ២១៦ នាក់ និងមធ្យោបាយកាណូត ៤៧ គ្រឿង បានចុះធ្វើការទប់ស្កាត់និងបង្ក្រាបបទល្មើសជលផលនៅតំបន់បឹងទន្លេសាប ស្ថិតក្នុងភូមិសាស្ត្រខេត្តកំពង់ឆ្នាំង ពោធិ៍សាត់ បាត់ដំបង សៀមរាប និងកំពង់ធំ៕
