ភ្នំពេញ៖ ភ្ញៀវទេសចរអន្តរជាតិ ដែលបានអញ្ជើញមកទស្សនាលើពន្លាទេសចរណ៍ ខាងមុខព្រះបរមរាជវាំង ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ រយៈពេល៣ថ្ងៃ ១៤-១៦ ខែវិច្ឆិកា មានចំនួន សរុប ៥ ៤៥០នាក់។
នេះបើតាមការបញ្ជាក់របស់ឯកឧត្តម គុជ បញ្ញាសា រដ្ឋលេខាធិការ ក្រសួងទេសចរណ៍ ថ្លែងប្រាប់ទីភ្នាក់ងារសារព័ត៌មានកម្ពុជា AKP កាល ពីយប់ថ្ងៃទី១៦ ខែវិច្ឆិកា ឆ្នាំ២០២៤។ ឯកឧត្តមបានឱ្យដឹងថា ភ្ញៀវទេសចរអន្តជាតិ ដែលបាន មកអង្គុយទស្សននៅលើវេទិកាទេសចរណ៍សុទ្ធតែបង្ហាញក្តីរីករាយជាខ្លាំង ក្រោមការទទួលស្វាគមន៍យ៉ាងកក់ក្តៅជាទីបំផុតពីមន្ត្រីបម្រើការងារ។ ឯកឧត្តមបានលើកឡើងថា ចំនួនភ្ញៀវអន្តរជាតិ សរុបទាំង៣ថ្ងៃ មានចំនួនសរុប ៥ ៤៥០នាក់នេះ ក្នុងនោះ គឺថ្ងៃទីមួយ ១ ៧០០នាក់ ថ្ងៃទីពីរ ១ ៧០០ នាក់ និងនៅថ្ងៃទីបី ២ ០៥០នាក់។
រដ្ឋលេខាធិការ ក្រសួងទេសចរណ៍ ឯកឧត្តម គុជ បញ្ញាសា ភ្ញៀវអន្តរជាតិ ដែលបានអញ្ជើញឡើងមកអង្គុយទស្សនានៅលើពន្លាទេសចរណ៍ ក្នុងរយៈពេលទាំង៣ថ្ងៃ នៃព្រះរាជពិធីបុណ្យអុំទូក បណ្តែប្រទីប និងសំពះព្រះខែ អកអំបុក ឆ្នាំ២០២៤ សុទ្ធតែប្រកបដោយទឹកមុខញញឹមញញែមស្រែកហ៊ោកញ្ជ្រៀវសាទរដល់កីឡាករដែលកំពុងបញ្ចេញកម្លាំងកាយបង្កើនសន្ទុះទូកយកជ័យជម្នះលើគូប្រកួត។
ភ្ញៀវទេសចរដែលមកទស្សនាលើពន្លាក្រសួងទេសចរណ៍នេះ ទទួលបានការទទួលបដិសណ្ឋារកិច្ចយ៉ាងកក់ក្តៅបំផុតពីមន្ត្រីក្រសួងទេសចរណ៍ និងទទួលបានខិត្តបណ្ណសម្រាប់អានស្វែងយល់បន្ថែមពីព្រះរាជពិធីបុណ្យអុំទូក ដែលមានជាភាសាអង់គ្លេស បារាំង និងភាសាចិន ព្រមទាំងមានមគ្គុទេសក៏ចាំជួយបកប្រែ ជួយសម្រួលជូនដល់ភ្ញៀវបរទេស។ ជាមួយគ្នានេះ ភ្ញៀវទេសចរក៏អាចពិសាទឹក និងភេសជ្ជៈដោយមិនគិតថ្លៃផងដែរ។
ក្នុងឱកាសនោះ ឯកឧត្តម គុជ បញ្ញាសា ក៏បានអំពាវនាវឱ្យភ្ញៀវទេចរមកលេងប្រទេសកម្ពុជាឱ្យបានច្រើនដងទៀត ដើម្បីទស្សនាព្រឹត្តិការណ៍ធំៗដូចជា បុណ្យអុំទូកជាដើម និងទស្សនាប្រាង្គប្រាសាទ ដើរលេងព្រៃភ្នំ ជ្រលងដងអូរ ទឹកធ្លាក់ដ៏សប្បូណ៌បែបនៅក្នុងព្រះរាជាណាចក្រកម្ពុជា៕
