ស្ពានអាកាសមិត្តភាពកម្ពុជា-ចិន សែនសុខ (ស្ពានអាកាសផ្សារដីហុយ) ជាស្ពានអាកាសទី៥ នៅក្នុងរាជធានីភ្នំពេញ ដែលមានគុណប្រយោជន៍ធំធេងក្នុងការជួយសម្រួលដល់លំហូរចរាចរណ៍ និងការធ្វើដំណើររបស់ប្រជាពលរដ្ឋបានមួយកម្រិត។ នេះបើយោងតាមការបញ្ជាក់ពីក្រសួងសាធារណការ និងដឹកជញ្ជូន នាថ្ងៃទី១៦ ខែនេះ។
ភ្នំពេញ៖ ស្ពាននេះមានប្រវែងសរុប ៩៤២ម៉ែត្រ ទទឹង ១៦,៥ម៉ែត្រ កម្ពស់៥,២០ម៉ែត្រ មានទីតាំងស្ថិតនៅប្រសព្វរវាងមហាវិថីសហព័ន្ធរុស្ស៊ី និងផ្លូវហាណូយ(១០១៩) ត្រូវបានសម្ពោធឱ្យប្រើប្រាស់ជាផ្លូវការនៅថ្ងៃទី០២ ខែកក្កដា ឆ្នាំ២០១៨។
ស្ពានអាកាសមិត្តភាពកម្ពុជា-ចិនសែនសុខ ហៅស្ពានអាកាសផ្សារដីហ៊ុយនេះ ត្រូវបានបើកសម្ពោធដាក់ឱ្យប្រើប្រាស់ជាផ្លូវការនៅកាលពីថ្ងៃច័ន្ទទី២ ខែកក្កដា ឆ្នាំ២០១៨ ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។
គម្រោងនេះ ចំណាយថវិកាសរុបប្រមាណ ១៧លានដុល្លារអាមេរិក ជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋា ភិបាលកម្ពុជា សម្រាប់ការដោះស្រាយផលប៉ះពាល់ ពន្ធ និងអាកងៗ។ ស្ពាននេះ បានប្រើពេលសាងសង់ចំនួន ២៤ខែ ចាប់ពីខែឧសភា ឆ្នាំ២០១៦ ហើយបញ្ចប់ការសាងសង់នៅខែឧសភា ឆ្នាំ២០១៨កន្លងទៅនេះ។
គួរបញ្ជាក់ផងដែរថានៅក្នុងពិធីសម្ភោធស្ពានអាកាសខាងលើ សម្តេចតេជោ បានគូសរំលេចថា ឥណទានដែលប្រើប្រាស់សម្រាប់គម្រោងសាងសង់ស្ពានអាកាសផ្សារដីហ៊ុយនេះ គឺត្រូវបានចុះហត្ថលេខាដែលធ្វើឡើង ក្នុងដំណើរទស្សនកិច្ចផ្លូវការរបស់ប្រធានាធិបតីចិន ឯកឧត្តម ហ្ស៊ី ជីនភីង នៅព្រះរាជាណាចក្រកម្ពុជា ហើយស្ពានអាកាសផ្សារដីហ៊ុយមួយនេះ មិនគ្រាន់តែបានចូលរួមដោះស្រាយនូវបញ្ហាការកក់ស្ទុះចរាចរណ៍ នៅតាមបណ្តោយមហាវិថីសហព័ន្ធរុស្ស៊ី នោះទេ ក៏ប៉ុន្តែវាបានភ្ជាប់ទំនាក់ទំនងផ្លូវនេះ ជាមួយខ្សែក្រវ៉ាត់របស់យើង ដែលហៅថាខ្សែក្រវ៉ាត់ទី២ផងដែរ។
ជាមួយគ្នានេះ វាបានតភ្ជាប់ពីទិសខាងជើង ជាមួយទិសខាងត្បូង នៃរាជធានីភ្នំពេញ ដោយអាចចាប់ផ្តើមធ្វើដំណើរតាមរយៈការបញ្ចៀសការកក់ស្ទុះចរាចរណ៍ នៅក្នុងទីក្រុងភ្នំពេញ ដោយចាប់ផ្តើមពីទំនប់កប់ស្រូវ រហូតមកតាមផ្លូវសហព័ន្ធរស្ស៊ីនេះ និងរហូតដល់ស្ពានតាខ្មៅឯណោះ។
គួរបញ្ជាក់ថា បច្ចុប្បន្ន រាជធានីភ្នំពេញមានស្ពានអាកាសចំនួន៩ បាននិងកំពុងលេចរូបរាងឡើង ដោយមានទាំងកំពុងចររាចរណ៍ និងកំពុងស្ថិតក្នុងការសាងសង់នៅឡើយ ដូចជា ស្ពានអាកាសក្បាលថ្នល់, ស្ពានអាកាស ៧មករា, ស្ពានអាកាសស្ទឹងមានជ័យ, ស្ពានអាកាសតិចណូ ឬ ស្ពានអាកាស ៥មករា, ស្ពានអាកាសផ្សារដីហុយ, ស្ពានអាកាស និងផ្លូវក្រោមដីចោមចៅ, ស្ពានអាកាសឫស្សីកែវ, ស្ពានអាកាសភ្លោះ និងស្ពានអាកាសមរតកតេជោ៕
