ភ្នំពេញ៖ សម្រាប់ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅរាជធានីភ្នំពេញ ឆ្នាំ២០២៤នេះមានការរៀបចំជាស្តង់ពិព័រណ៍ចំនួន១៣កន្លែង និងមានស្តង់ជាង៤០០ស្តង់ ហើយក៏មានស្តង់រាយរងផ្សេងៗទៀតដែរ ហើយស្តង់ពិព័រណ៍ភាគច្រើន មាននៅតាមតំបន់សប្បាយ កន្លែងប្រគុំតន្ត្រីជាដើម។
លោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ និងជាអ្នកនាំពាក្យសាលារាជធានីភ្នំពេញ បានបញ្ជាក់ឱ្យដឹងថ្ងៃទី១៣ ខែវិចិ្ឆកា ឆ្នាំ២០២៤ថា តាមរបាយការណ៍ដែលរដ្ឋបាលរាជធានីភ្នំពេញទទួលបាន កន្លែងរៀបចំស្តង់ពិព័រណ៍មានចំនួន១៣កន្លែង និងមានស្តង់ចន្លោះពី៤៣០ ដល់៤៥០ស្តង់ ហើយក៏នៅមានស្តង់រាយរងផ្សេងៗទៀតដែរ។
លោកស្រីបន្តទៀតថា ក្នុងឱកាសព្រះរាជពិធីបុណ្យអុំទូកឆ្នាំនេះ នឹងមានបងប្អូនប្រជាពលរដ្ឋចូលរួមច្រើន ហើយការលក់ដូរក៏មានច្រើនដែរ។ ដូច្នេះដើម្បីឱ្យកន្លែងលក់ដូរមានសោភ័ណភាព មានអនាម័យល្អ ក្នុងនាមរដ្ឋបាលរាជធានីភ្នំពេញ លោកស្រីស្នើឱ្យបងប្អូនអាជីវករ ចូលរួមទុកដាក់សម្ភារ និងរៀបចំទុកដាក់ឱ្យមានអនាម័យ ដើម្បីភាពស្រស់ស្អាត និងដើម្បីព្រះរាជពិធីបុណ្យអុំទូកឆ្នាំនេះប្រព្រឹត្តទៅដោយរលូន។ ក្នុងនេះលោកស្រី ក៏បានថ្លែងអំណរគុណដល់រាជរដ្ឋាភិបាលផងដែរ ដែលបានធ្វើឱ្យប្រទេសជាតិមានសុខសន្តិភាព និងមានការអភិវឌ្ឍលើគ្រប់វិស័យ។
សូមបញ្ជាក់ថា ចំនួនស្តង់ពិព័រណ៍ទាំង១៣កន្លែងនេះ រួមមាន៖ សួនច្បារវត្តបទុមវតី ផ្នែកខាងត្បូង និងផ្នែកខាងជើង ក្រោយផ្សាររាត្រី សួនព្រះនាងប្រាជ្ញាបារមី កោះពេជ្រកន្លែងចុះចត Helicopter កោះពេជ្រខាងមុខអគារL កោះពេជ្រកន្លែងរៀបចំស្តង់ពិព័រណ៍សម្រាប់ជួល ទីលានប្រជាធិបតេយ្យ រោងអាយ៉ៃវត្តភ្នំ សួនមុខក្រុមប្រឹក្សាអភិវឌ្ឍន៍កម្ពុជាCDC ក្បែររង្វង់មូលនាងមច្ឆាOCIC ជ្រោយចង្វារ និងពីរកន្លែងទៀតរៀបចំដោយក្រុមហ៊ុនឯកជនសម្រាប់លក់ផលិតផល និងសម្រាប់កន្លែងអង្គុយសាកថ្មទូរស័ព្ទដោយមិនយកថវិកាផងដែរ៕
