ភ្នំពេញ៖ រដ្ឋបាលរាជធានីភ្នំពេញបានត្រៀមលក្ខណៈរួចរាល់អស់ហើយ ដើម្បីទទួលអំណរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ ដែលនឹងប្រព្រឹត្តទៅនៅថ្ងៃទី១៤-១៥-១៦ វិច្ឆិកា ឆ្នាំ២០២៤។
តាមការបញ្ជាក់របស់លោកស្រី ដោ សម្ផស្ស អ្នកនាំពាក្យសាលារាជធានីភ្នំពេញ នៅថ្ងៃទី១៣ ខែវិច្ឆិកា ឆ្នាំ២០២៤ ថា ការរៀបចំកែលម្អសោភ័ណភាពបរិស្ថានទីក្រុង ក៏ដូចការពង្រឹងសន្តិសុខសណ្តាប់ធ្នាប់របៀបរៀបរយ ក្នុងឱកាសព្រះរាជពិធីបុណ្យ ត្រូវបានពង្រឹង និងរៀបចំយ៉ាងស្រស់ស្អាត រង់ចាំទទួលស្វាគមន៍ភ្ញៀវទេសចរជាតិ-អន្តរជាតិមកលេងកម្សាន្តក្នុងឱកាសព្រះរាជពិធីបុណ្យអ៊ុទូកខាងមុខនេះ។ ការរៀបចំកែលម្អសោភ័ណភាពទីក្រុងនាពេលនេះ គឺជាការរួមចំណែករក្សាប្រពៃណីទំនៀមទម្លាប់ជាតិដែលមានយូរលុងមកហើយ។ ម្យ៉ាងទៀតដើម្បីទាក់ទាញភ្ញៀវទេសចរមកលេងកម្សាន្តនៅរាជធានីភ្នំពេញដែលជាបេះដូងនៃព្រះរាជាណាចក្រកម្ពុជាដែលកំពុងមានឈ្មោះបោះសំឡេងលើឆាកជាតិ និងអន្តរជាតិ ដោយចាត់ទុកជាទីក្រុងស៊ីវិល័យមួយនៅអាស៊ីអាគ្នេយ៍ក្នុងសុខសន្តិភាពដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។
ក្រោមការដឹកនាំអនុវត្តផ្ទាល់ពីឯកឧត្តម ឃួង ស្រេង អភិបាលរាជធានីភ្នំពេញ ក្នុងបុព្វហេតុអភិវឌ្ឍន៍រាជធានីភ្នំពេញ និងសុខុមាលភាពប្រជាពលរដ្ឋដែលរស់នៅក្នុងរាជធានីភ្នំពេញ ឯកឧត្ដមអភិបាលរាជធានីក៏បានណែនាំឱ្យមន្ត្រីជំនាញ ធ្វើការជួសជុលតុបតែង កែលម្អ ជួសជុលក្រានីត ការ៉ូឡា សួនច្បារ សាងសង់បង្គន់អនាម័យ និងបន្ទប់ទឹក និងពង្រាយបង្គន់អនាម័យចល័ត ព្រមទាំងការងារផ្សេងៗទៀត ហើយបើគិតមកដល់ពេលនេះ ការងារខាងលើអនុវត្តសម្រេចបាន១០០ភាគរយហើយ លាបថ្នាំតាមច្រាំងទន្លេ (មុខពន្លាជ័យ) លាបក្បាច់បង់អង្គុយថ្មម៉ាប លាបបង់អង្គុយ លាបបង្គោលភ្លើងថ្ម លាបរូបសំណាកតោ និងហ៊ុមព័ទ្ធរបងសួនច្បារវិមានឯករាជ្យ សួនច្បារមាត់ទន្លេ (ចាប់ពីផ្សាររាត្រីដល់សាលសន្និសីទចតុមុខ) ការដាក់ស្លាកសញ្ញាបង្ហាញទីតាំងសំខាន់ៗ ជាមួយការត្រៀមកម្លាំងសម្រាប់បោសសម្អាតសួនច្បាររយ:ពេល៤ថ្ងៃ ចាប់ពីថ្ងៃ១៤-១៧ ខែវិច្ឆិកា ឆ្នាំ២០២៤ គឺសុទ្ធតែបានត្រៀមរួចរាល់៕
