សៀមរាប៖ តាមកម្មវិធីដែលបានបង្ហាញឱ្យដឹង ខេត្តសៀមរាបនៅចុងខែតុលា ឆ្នាំ២០២៤ នេះនឹងមានព្រឹត្តិការណ៍ធំៗចំនួន២ នឹងប្រារព្ធឡើង ។នោះគឺពិព័រណ៍ម្ហូបអាហារកម្ពុជា-ចិន ដើម្បីផ្សព្វផ្សាយមុខម្ហូប និងសក្តានុពលទេសចរណ៍រៀបចំពីថ្ងៃទី២៦ដល់ថ្ងៃទី២៧ ខែតុលា និងព្រឹត្តិការណ៍«ស្នាមញញឹមនៃកម្ពុជាលើកទី២ » នឹងប្រព្រឹត្តទៅនាថ្ងៃទី២៩ – ៣០ ខែតុលា ឆ្នាំ២០២៤ ។នៅខេត្តសៀមរាបដដែលអាកាសយានដ្ឋានអន្តរជាតិសៀមរាបអង្គររំពឹងថា ទទួលបានអ្នកដំណើរ ១លាន៥សែននាក់នៅដំណាច់ឆ្នាំនេះ។
យោងសេចក្តីប្រកាសព័ត៌មានរបស់ក្រសួងទេសចរណ៍ថ្ងៃទី២២ ខែតុលា បានឱ្យដឹងថា ក្រសួងនឹងរៀបចំពិព័រណ៍ម្ហូបអាហារ កម្ពុជា-ចិន (Cambodia-China Gastronomy Week) នៅខេត្តសៀមរាប ដោយមានស្តង់តាំងបង្ហាញសរុបប្រមាណ១០០ស្តង់ ។ ក្រៅពីនេះក៏មានសិក្ខាសាលាម្ហូបអាហារ (Gastronomy Conference) ក្រោមប្រធានបទ “Good Food for All” ក្រោមវត្តមានវាគ្មិនល្បីៗមកចែករំលែកបទពិសោធស្តីពីម្ហូបអាហារកម្ពុជា និងចិន។
ក្រសួងទេសចរណ៍បានគូសបញ្ជាក់អំពីគោលបំណងនៃរៀបចំព្រឹត្តិការណ៍គឺដើម្បីជំរុញការផ្សព្វផ្សាយពីមុខម្ហូប និងសក្តានុពលទេសចរណ៍ដ៏សម្បូរបែបរបស់កម្ពុជាឱ្យកាន់តែទូលំទូលាយទៅកាន់ទីផ្សារអន្តរជាតិ ជាពិសេសទីផ្សារចិន ព្រមទាំងពង្រឹងទំនាក់ទំនង និងកិច្ចសហប្រតិបត្តិការល្អក្នុងវិស័យទេសចរណ៍រវាងផ្នែករដ្ឋ-ឯកជន កម្ពុជា-ចិន និងបន្តជំរុញយុទ្ធនាការផ្សព្វផ្សាយ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» ព្រមទាំងចូលរួមជំរុញយុទ្ធនាការ «ឆ្នាំទស្សនាសៀមរាប ២០២៤» សំដៅទាក់ទាញទេសចរ និងវិនិយោគិនចិនឱ្យមកទស្សនា និងវិនិយោគនៅកម្ពុជាឱ្យបានកាន់តែច្រើនថែមទៀត។
ក្រសួងទេសចរណ៍ ក៏បានអំពាវនាវដល់ប្រតិបត្តិករទេសចរណ៍ គ្រប់សមាគមទេសចរណ៍ផ្នែករដ្ឋ ឯកជន ស្ថាប័នពាក់ព័ន្ធ សារព័ត៌មានជាតិ-អន្តរជាតិ និងសាធារណជន ចូលរួមផ្សព្វផ្សាយអំពីពិព័រណ៍ម្ហូបអាហារកម្ពុជា-ចិន (Cambodia-China Gastronomy Week)ឱ្យបានទូលំទូលាយ ។
ដោយឡែកព្រឹត្តិការណ៍មួយទៀតដែលរៀបចំដោយក្រសួងវប្បធម៌និងវិចិត្រសិល្បៈ គឺព្រឹត្តិការណ៍«ស្នាមញញឹមនៃកម្ពុជាលើកទី២ » នឹងប្រព្រឹត្តទៅនាថ្ងៃទី២៩ – ៣០ ខែតុលា ដែលត្រូវនឹងថ្ងៃខួបលើកទី២០ នៃព្រះរាជពិធីគ្រងព្រះបរមរាជសម្បត្តិរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
ក្រសួងវប្បធម៌ និងវិចិត្រសិល្បៈនឹងនាំមកនូវផ្ទាំងទស្សនីយភាពយ៉ាងអស្ចារ្យ រំលេចនូវវប្បធម៌ដ៏យូរលង់ អរិយធម៌ដ៏ចំណាស់ ព្រមទាំងមានការដង្ហែក្បួនទ័ព ពីក្រុមនាថការី ក្រុមសិល្បៈល្បីៗជាង ៥០០នាក់ នៅខាងក្នុងប្រាសាទអង្គរ ។ លើសពីនោះក៏មានការតាំងពិព័រណ៍ម្ហូប សំលៀកបំពាក់ខ្មែរ រួមទាំងវត្ថុអនុស្សាវរីយ៍ស្នាដៃកូនខ្មែរថែមទៀតផង។
ទាក់ទងនឹងខេត្តសៀមរាបដដែលនេះដែរកាលពីថ្ងៃទី១៦ ខែតុលាកន្លងទៅថ្មីៗនេះក្នុងឱកាសខួបគម្រប់១ឆ្នាំនៃការបើកដំណើរការជាផ្លូវការនៃអាកាសយានដ្ឋានអន្តរជាតិ សៀមរាបអង្គរ ,អាកាសយានដ្ឋានអន្តរជាតិកម្រិត 4E មួយនេះបានបង្ហាញថា មានអ្នកដំណើរ ហោះហើរចេញ និងចូលជាង ១ ៣០០ ០០០នាក់ និងរំពឹងថាកើនដល់ ១ ៥០០ ០០០នាក់ នៅដំណាច់ឆ្នាំ២០២៤នេះ៕
