គម្រោងផែនការវិនិយោគហេដ្ឋារចនាសម្ព័ន្ធ ប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិច ក្នុងភូមិសាស្ត្ររាជធានីភ្នំពេញ ការដ្ឋានដាក់លូប្រអប់ទំហំ៤ម៉ែត្រx២ម៉ែត្រ នៅផ្លូវជាតិលេខ៤ ប្រវែង៥៦៥០ម៉ែត្រ និងគម្រោងស្ថាបនាជញ្ជាំងបេតុងប្រឡាយបារាំង នៅផ្លូវមហាវិថីស៊ីជីន ពីង គិតត្រឹមថ្ងៃទី១៦ ខែកញ្ញា ឆ្នាំ២០២៤នេះ សម្រេចបានជាង១០ភាគរយហើយ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានបញ្ជាក់ឱ្យដឹងនៅថ្ងៃទី១៦ ខែកញ្ញា ឆ្នាំ២០២៤ថា ការដ្ឋានដាក់លូប្រអប់ទំហំ៤ម៉ែត្រx ២ម៉ែត្រ នៅផ្លូវជាតិលេខ៤ ប្រវែង៥៦៥០ម៉ែត្រ ក្នុងសង្កាត់ចោមចៅទី៣ ខណ្ឌពោធិ៍សែនជ័យ និងគម្រោងស្ថាបនាជញ្ជាំងបេតុងនៃប្រឡាយបារាំង ចាប់ពីផ្លូវមហាវិថីស៊ី ជីនពីង ដល់អាកាសយានដ្ឋានអន្តរជាតិភ្នំពេញ ដែលជាគម្រោងផែនការវិនិយោគហេដ្ឋារចនាសម្ព័ន្ធ ប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ គិតត្រឹមថ្ងៃនេះ ស្ថាបនាបានជាង១០ភាគរយហើយ។
លោកប្រធានមន្ទីរបានបន្ដថា ការដ្ឋានដាក់លូប្រអប់ខ្នាតធំទំហំ៤ម៉ែត្រx២ម៉ែត្រ នៅផ្លូវជាតិលេខ៤ ចាប់ពីមហាវិថី ស៊ី ជីនពីង (ផ្លូវក្រវ៉ាត់ក្រុងទី៣) ក្នុងសង្កាត់ចោមចៅទី៣ ខណ្ឌពោធិ៍សែនជ័យ ឆ្លងកាត់សង្កាត់កំបូល ខណ្ឌកំបូល ដល់ព្រំប្រទល់ស្រុកអង្គស្នួល ខេត្តកណ្ដាល អាចរំដោះទឹកក្នុងខណ្ឌកំបូល និងខណ្ឌពោធិ៍សែនជ័យ នៅភូមិសាស្ត្ររាជធានីភ្នំពេញ។ ការដាក់លូប្រអប់ខ្នាតធំនេះ ជាការដ្ឋានមួយស្ថិតក្នុងគម្រោងផែនការវិនិយោគហេដ្ឋារចនាសម្ព័ន្ធ ប្រព័ន្ធលូ និងប្រព័ន្ឋរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ។ គិតត្រឹមថ្ងៃទី១៦ ខែកញ្ញានេះ គម្រោងនេះសម្រេចដាក់លូបានប្រវែង៦២៤ម៉ែត្រ។
ដោយឡែក ការស្ថាបនាជញ្ជាំងបេតុងនៃប្រឡាយបារាំង ចាប់ពីផ្លូវមហាវិថីស៊ីជីនពីង (ផ្លូវក្រវ៉ាត់ក្រុងទី៣) ដល់អាកាសយានដ្ឋានអន្តរជាតិភ្នំពេញ ដែលស្ថិតក្នុងគម្រោងផែនការវិនិយោគហេដ្ឋារចនាសម្ព័ន្ធ ប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញដែលនោះ គិតត្រឹមថ្ងៃនេះ ការដ្ឋានសម្រេចលទ្ធផលបានប្រវែង៣២០ម៉ែត្រ។ គម្រោងនេះនឹងកាត់បន្ថយបាននូវការជន់លិចដោយទឹកភ្លៀងនៅតំបន់ខាងត្បូង និងខាងកើតអាកាសយានដ្ឋានអន្តរជាតិភ្នំពេញ នៃភូមិសាស្ត្រខណ្ឌសែនសុខ និងខណ្ឌពោធិ៍សែនជ័យ។
សូមបញ្ជាក់ថា ផ្លូវក្រវ៉ាត់ក្រុងទី៣របស់រាជធានីភ្នំពេញត្រូវប្រសិទ្ធនាមឈ្មោះផ្លូវជាមហាវិថីស៊ី ជីនពីង កាលពីថ្ងៃទី១៩ ខែកក្កដា ឆ្នាំ២០២៤ ក្រោមអធិបតីភាព ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា៕
