កិច្ចប្រជុំលើកទី៦ ថ្នាក់រដ្ឋមន្ត្រីបរិស្ថានមហាអនុតំបន់មេគង្គ និងកិច្ចប្រជុំពាក់ព័ន្ធ (The 6th GMS Environment Ministers’ Meeting, EMM-6) ត្រូវបានបើកជាផ្លូវការនៅព្រឹកថ្ងៃទី១៣ ខែកញ្ញា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ដោយឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានកម្ពុជា និងជាសហប្រធាននៃកិច្ចប្រជុំរដ្ឋមន្ត្រីបរិស្ថាននៃមហាអនុតំបន់មេគង្គ និងលោកជំទាវ Fatima Yasmin អនុប្រធានធនាគារអភិវឌ្ឍន៍អាស៊ី (ADB) ទទួលបន្ទុកខាងវិស័យ និងផ្នែក និងប្រធានប្រតិភូ ADB ព្រមទាំងមានការចូលរួមពីគណៈប្រតិភូរដ្ឋមន្ត្រីបរិស្ថាននៃបណ្តាប្រទេសជាសមាជិកនៃមហាអនុតំបន់មេគង្គចំនួន ៦ប្រទេស ដែលរួមមានប្រទេសចិន កម្ពុជា ឡាវ ថៃ មីយ៉ាន់ម៉ា និងវៀតណាម។
កិច្ចប្រជុំថ្នាក់រដ្ឋមន្ត្រីបរិស្ថាននៃមហាអនុតំបន់មេគង្គ (GMS) គឺជាវេទិកាកម្រិតខ្ពស់ដែលរដ្ឋមន្ត្រីបរិស្ថានមកពីបណ្តាប្រទេស GMS មករួមគ្នាដើម្បីពិភាក្សា និងសម្របសម្រួលយុទ្ធសាស្ត្រ និងគោលនយោបាយបរិស្ថានក្នុងតំបន់ ដែលប្រទេសកម្ពុជាធ្វើជាម្ចាស់ផ្ទះ បានចាប់ផ្តើមជាផ្លូវការនៅរាជធានីភ្នំពេញ។
កិច្ចប្រជុំថ្នាក់រដ្ឋមន្ត្រីបរិស្ថានលើកទី៦ ត្រូវបានគេរំពឹងថានឹងអនុម័តនូវឯកសារសំខាន់ចំនួន២ គឺ ១៖ ក្របខ័ណ្ឌយុទ្ធសាស្ត្រ GMS 2030 សម្រាប់ការពន្លឿនសកម្មភាពអាកាសធាតុ និងចីរភាពបរិស្ថាន និង ២៖ សេចក្តីថ្លែងការណ៍រួមរាជធានីភ្នំពេញស្តីពីការទប់ស្កាត់ការបំពុលប្លាស្ទិកនៅក្នុង GMS ការចែករំលែកចំណេះដឹងក្នុងតំបន់ និងការកសាងសមត្ថភាពនៅទូទាំង GMS ក៏ដូចជាកំណត់កម្មវិធីឆ្ពោះទៅមុខដើម្បីដោះស្រាយបញ្ហានៃការប្រែប្រួលអាកាសធាតុ និងបរិស្ថាន។
សូមជម្រាបថា នៅក្នុងកិច្ចប្រជុំកំពូលឆ្នាំ២០២១ GMS បានពង្រឹងការប្តេជ្ញាចិត្តចំពោះការអភិវឌ្ឍប្រកបដោយបរិយាប័ន្ន និងចីរភាព រួមទាំងរបៀបវារៈឆ្នាំ២០៣០ របស់អង្គការសហប្រជាជាតិសម្រាប់ការអភិវឌ្ឍប្រកបដោយចីរភាព និងកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ។ គោលបំណងនៃក្របខ័ណ្ឌយុទ្ធសាស្ត្រ GMS 2030 សម្រាប់ការពន្លឿនសកម្មភាពអាកាសធាតុ និងចីរភាពបរិស្ថាន គឺដើម្បីផ្តល់ដល់សកម្មភាពជាអាទិភាពដើម្បីពន្លឿនការអនុវត្តឆ្ពោះទៅសម្រេចបានការប្តេជ្ញាចិត្តនៅថ្នាក់ជាតិ និងអន្តរជាតិស្តីពីភាពធន់នឹងអាកាសធាតុ ការកាត់បន្ថយឧស្ម័នផ្ទះកញ្ចក់ ការអភិរក្សជីវៈចម្រុះ និងចីរភាពបរិស្ថាន។
ក្របខណ្ឌយុទ្ធសាស្ត្រ GMS 2030 បង្កើតជាមូលដ្ឋានសម្រាប់កិច្ចសហការស្តីពីអាកាសធាតុ និងបរិស្ថាន តាមរយៈកម្មវិធីជំនួយបច្ចេកទេស ព្រមទាំងកម្មវិធីវិនិយោគ និងការគាំទ្ររផ្នែកហិរញ្ញប្បទាន។
កម្ពុជាមានការយកចិត្តទុកដាក់ខ្ពស់លើការដោះស្រាយការបំពុលបរិស្ថាននៅថ្នាក់ជាតិ និងថ្នាក់តំបន់។ កម្ពុជាបានលើកជាគំនិតផ្តួចផ្តើមស្តីពីការបង្ការការបំពុលដោយប្លាស្ទិកក្នុងមហាអនុតំបន់មេគង្គ ដើម្បីបង្ហាញពីភាពជោគជ័យក្នុងការកាត់បន្ថយការបំពុលដោយប្លាស្ទិក តាមរយៈយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ»៕
