ផ្លែទៀបស្វិតបានផ្តល់ប្រាក់កម្រៃរាប់ពាន់ដុល្លាអាមេរិកដល់កសិករដែលប្រកបរបរដាំដុះដំណាំនេះ។ បច្ចុប្បន្នមិនសូវមានកសិករនិយមដាំ ដំណាំទៀបស្វិតប៉ុន្មានទេ ដោយហេតុដូច្នេះទើបវាមានតម្លៃខ្ពស់នៅលើទីផ្សារ។កសិករម្នាក់ដែលដាំដំណាំនេះនិយាយថាគាត់អាចរកចំណូលបានរាប់ពាន់ដុល្លារ ពីការលក់ផ្លែទៀបស្វិតក្នុងមួយរដូវ។ ដំណាំទៀបជាង២០០០ដើម ត្រូវបានកសិកររូបនេះដាំដុះលើផ្ទៃដីជាង៣ហិកតា នៅលើទីទូលមិនរាបស្មើ ដែលមើលទៅផ្លែរយីងរយោងតាមចង្កេះភ្នំ នៅតំបន់ឆ្អោង ក្នុងភូមិសាស្ដ្រស្រុកសំឡូត ខេត្តបាត់ដំបង។
លោក រ៉ាន់ រួន អាយុ៣៥ឆ្នាំ ជាកសិករម្ចាស់ចម្ការទៀបស្វិតនៅតំបន់ឆ្អោងក្នុង ភូមិទួលពោធិ៍ ឃុំសំឡូត ស្រុកសំឡូត ខេត្តបាត់ដំបង បានប្រាប់ឱ្យដឹងថា ដោយមើលឃើញថា ទៀបស្វិតមានទីផ្សារល្អ ប្រជាជនចូលចិត្តនិយមទទួលទានច្រើន និងនៅតំបន់ដែលលោករស់នៅគ្មានអ្នកដាំផងនោះ លោកបានសម្រេចចិត្តដាំដំណាំនេះអស់រយៈពេល៨ឆ្នាំមកហើយ។ ការដាំទៀបស្វិតមានលក្ខណៈងាយស្រួលដោយដាំមិនប្រើថ្នាំ និងជីគីមីនោះទេ គឺថែទាំតាមលក្ខណៈធម្មជាតិប្រើជីលាមកគោក្របី។ ដីនៅតំបន់ឆ្អោងមានជីវជាតិល្មមនឹងការលូតលាស់របស់ទៀបស្វិត និងមិនមានដង្កូវស៊ីស្លឹកនោះទេ។
កសិកររូបនេះបានបន្ថែមថា ចំពោះការថែទាំ ដោយគ្រាន់តែចងថង់ការពារដង្កូវចោះផ្លែ និងមើលទៅលើផ្លែកាលណាមានផ្លែច្រើនពេកត្រូវបេះចោលខ្លះព្រោះដាំជាលក្ខណៈធម្មជាតិអត់មានអ្វីជំនួយទេ ដូច្នេះផ្លែច្រើនពេកបណ្ដាលឱ្យងាប់ដើម។ ទៀបស្វិតរបស់លោកដែលបានដាំលើផ្ទៃដី៣ហិកតា និងមានចំនួនជាង២០០០ដើមនេះ ប្រមូលផលបាន៧ដងក្នុងមួយឆ្នាំ ការប្រមូល ផលមានការប្រែប្រួលទៅតាមឆ្នាំដោយឆ្នាំមុនៗបាន៦ទៅ៧តោន តែសម្រាប់ឆ្នាំនេះប្រមូលបានប្រហែល១០តោន។ ពីមួយឆ្នាំទៅមួយឆ្នាំដើមកាន់តែធំផ្លែកាន់ច្រើន ហើយការប្រមូលផលដំបូងប្រើរយៈពេល១ឆ្នាំជាងបានបន្តិចបន្តួចលុះដល់២ឆ្នាំបានពេញលេញទើបប្រមូលបានច្រើន។ ឥឡូវនេះផ្លែទៀបកំពុងតែផ្លែក្នុង១រដូវមានរយៈពេលមួយខែជាងអាចប្រមូលផលអស់ដោយមានជួលកម្មករជួយបេះចំនួន២នាក់ទើបបេះទាន់។
លោកបានប្រាប់ថា សព្វថ្ងៃនេះប្រមូលបាន២០ ទៅ៣០ភាគរយនៃផលទៀប គឺបានចំនួន៣តោន ចំពោះទីផ្សារវិញ ថ្ងៃខ្លះក៏ដាក់ទាន់ឱ្យម៉ូយ ថ្ងៃខ្លះក៏មិនទាន់។ សម្រាប់ឆ្នាំនេះ ទៀបស្វិត មានតម្លៃល្អអាចបាន១គីឡូ ៥៥០០៛ ទៅ៦០០០ ៛សម្រាប់ការបោះដុំ។ អតិថិជននៅភ្នំពេញ ខេត្តបាត់ដំបង និងខេត្តផ្សេងៗទៀត ដែលនៅឆ្ងាយៗក៏អាចបញ្ជាទិញបាន តែពេលខ្លះមិនអាចផ្ញើទៅបាន ព្រោះផ្លែទៀបឆាប់ទុំពេលបណ្ដាលឱ្យខូចមុនពេកទៅដល់។ ដោយសារទីផ្សារផ្លែទៀបឆ្នាំនេះមានតម្លៃល្អក្នុង១រដូវកាល លោកអាចរកប្រាក់ចំណូលបានចន្លោះពី៦០០០ដុល្លារទៅដល់៧០០០ដុល្លារអាមេរិក។ ដោយមើលឃើញពីប្រាក់ចំណូលនេះមានកសិករមួយចំនួនបានមករៀនពីការដាំដុះ និងទិញកូនទៀបពីចម្ការរបស់លោកយកទៅដាំ។
ទន្ទឹមនឹងនេះ កសិកររូបនេះបានសំណូមពរឱ្យមានការគាំទ្រផលិតផលរបស់ខ្មែរយើងដែលមិនប្រើជី និងថ្នាំគីមីដែលនាំឱ្យប៉ះពាល់ដល់សុខភាព ហើយប្រជាកសិករ ដែលមានដីទំនេរអាចសាកល្បងដាំដំណាំហូបផ្លែនេះបាន ព្រោះដំណាំទៀបស្វិតមិនពិបាកក្នុងការថែទាំ មិនរើសប្រភេទដី និងមានតម្រូវការទីផ្សារល្អជាដើម៕
