ខេត្តកំពត និងខេត្តកែប គឺជាខេត្តចំនួន២ ក្នុងចំណោមខេត្តចំនួន៤ ព្រែកជីកហ្វូណនតេជោ ឆ្លងកាត់។ពិសេសខេត្តទាំង២ ជាខេត្តភ្ជាប់ ទៅកាន់សមុទ្រផ្ទាល់ ។ខណៈនេះវិនិយោគិនបរទេសនិងក្នុងស្រុកជាច្រើនបានចាប់ផ្ដើមសម្លឹងឱកាសវិនិយោគនៅខេត្តទាំង២។
ភ្នាក់ងារអចលនទ្រព្យប្រចាំខេត្តកំពត និងខេត្តកែប បានលើកឡើងថា បន្ទាប់ពីរាជរដ្ឋាភិបាលកម្ពុជាបានបើកការដ្ឋានសាងសង់ព្រែកជីក ហ្វូណនតេជោ កាលពីថ្ងៃទី៥ ខែសីហា ឆ្នាំ២០២៤ ក៏មានអ្នកវិនិយោគបរទេសមួយក្រុមស្វែងរកការវិនិយោគលើអគារកំពុងដំណើរការនៅក្នុងខេត្តកែប និងវិនិយោគលើសណ្ឋាគារ ឬបដិសណ្ឋារកិច្ចនៅក្នុងខេត្តនេះ។ ភ្នាក់ងារដដែលបានកត់សម្គាល់ថា សកម្មភាពក្រុមវិនិយោគិន បានកើតឡើងតែប៉ុន្មានសប្ដាហ៍ក្រោយការបើកការដ្ឋាន និងស្របពេលរាជរដ្ឋាភិបាលចេញសេចក្ដីជូនដំណឹងស្ដីពីការបន្តការអភិវឌ្ឍឆ្នេរខ្សាច់កម្សាន្តកម្រិតខ្ពស់នៅក្នុងខេត្តកែប ។ ការអភិវឌ្ឍឆ្នេរកម្សាន្តនេះដែរ នឹងទាក់ទាញការវិនិយោគបន្ថែមពីក្នុងក្រៅប្រទេស និងក្នុងប្រទេសចូលមកបណ្ដាក់ទុនវិនិយោគ នៅក្នុងខេត្តកែបនិងកំពតបន្ថែមទៀត ។
លោកជិន ណារិន នាយកប្រតិបត្តិក្រុមហ៊ុនសាន់សាញរៀលអ៊ីស្ទេត បានប្រាប់បណ្ដាញសារព័ត៌មានថា ដោយសារតែខេត្តកែបនិងកំពតជាខេត្តដែលបំពេញបន្ថែមឱ្យគ្នា ដូច្នេះនៅពេលខេត្តណាមួយមានការ អភិវឌ្ឍ វានឹងធ្វើឱ្យទេសចរនិងវិនិយោគិនអាចស្វែងរកតំបន់ដែលនៅជាប់គ្នានោះ ជាក់ស្ដែងនៅពេលរដ្ឋាភិបាលអភិវឌ្ឍព្រែកជីកហ្វូណនតេជោ ពីទន្លេបាសាក់មកកាន់ខេត្តកែប និងគម្រោងអភិវឌ្ឍន៍ឆ្នេរកម្សាន្តកម្រិតខ្ពស់នៅក្នុងខេត្តកែប វាក៏នឹងធ្វើឱ្យខេត្តកំពតមានសក្ដានុពលក្នុងការទាក់ទាញការវិនិយោគមួយកម្រិតទៀតផងដែរ។លោកបន្តថា វឌ្ឍនភាពនៃហេដ្ឋារចនាសម្ព័ន្ធដែលរាជរដ្ឋាភិបាលបាននិងកំពុង អភិវឌ្ឍន៍ លោកជឿថានៅពេលអនាគត ខេត្តកែប និងកំពតកាន់តែមាន សក្ដានុពលទាក់ទាញការវិនិយោគ និងមានវិនិយោគិនក្នុងនិងក្រៅប្រទេសចូលមកបណ្ដាក់ទុន។
ស្រដៀងគ្នានេះដែរ លោក លឹម រដ្ឋា ភ្នាក់ងារអចលនទ្រព្យប្រចាំខេត្ត កែប បានបញ្ជាក់ថា តាំងពីការប្រកាសសាងសង់ព្រែកជីកមកេម្ល៉ះ មានអ្នកស្វែងរកទិញដីទាំងខ្នាតតូចៗនិងធំ ជាច្រើន ប៉ុន្តែអ្នកទិញចង់បានតម្លៃទាប ក្នុងពេលស្ថានភាពមិនទាន់ប្រសើរ ហើយអ្នកលក់ចង់លក់ក្នុងតម្លៃខ្ពស់ ដោយគិតថាសក្ដានុពលតំបន់នេះកាន់តែល្អប្រសើរ ។ដូច្នេះការទិញលក់មិនសូវមានច្រើនទេ តែសម្រាប់អចលនទ្រព្យណាដែលមានតម្លៃទាបជាងទីផ្សារឃើញថាមានការទិញលក់ច្រើនដដែល ៕
