កំពង់ធំ៖ ឯកឧត្តម សុត គឹមកុលមុនី អគ្គលេខាធិការរងគណៈកម្មាធិការជាតិ គ្រប់គ្រងគ្រោះ មហន្តរាយ និងឯកឧត្តមប្រតិភូក្រសួងកសិកម្មរុក្ខាប្រមាញ់និងនេសាទ អភិបាលរងខេត្ត រដ្ឋបាលស្រុក/ឃុំ រួមទាំងមន្ត្រីកសិកម្មឃុំ បានញ្ជើញចុះពិនិត្យស្ថានភាពផលប៉ះពាល់ និងខូចខាតដោយជំនន់ទឹកភ្លៀងលើដំណាំស្រូវនៅឃុំព្នៅ និងតាំងក្រសាំងស្រុកសន្ទុក ខេត្តកំពង់ធំ កាលពីថ្ងៃអង្គារ ទី៣០ ខែកក្កដា ឆ្នាំ២០២៤។
តាមសេចក្ដីរាយការណ៍ពីមន្ទីរ ធនធានទឹកនិងឧតុនិយមខេត្តកំពង់ធំ នាព្រឹកថ្ងៃពុធ ទី៣១ ខែកក្កដា ឆ្នាំ២០២៤ បានឱ្យដឹងថា ថ្ងៃនេះស្ថានភាពទឹកស្ទឹងទាំង៤ របស់ខេត្តកំពង់ធំ នៅតែបន្តកើនឡើងនិងមានភ្លៀងធ្លាក់ស្ទើររៀងរាល់ថ្ងៃ។
កម្រិតកម្ពស់ទឹកស្ទឹងសែន នៅស្ថានីយកំពង់ធំទឹកមានកម្ពស់១៣,៧៥ម៉ែត្រ ខ្ពស់ជាង ថ្ងៃម្សិលមិញ០,០៦ម៉ែត្រ។ កម្ពស់ទឹកដែលត្រូវប្រុងប្រយ័ត្ន១៣,៥០ម៉ែត្រ។ នៅស្ថានីយ ស្រុកសណ្ដាន់ទឹកមានកម្ពស់១៩,២២ម៉ែត្រ ខ្ពស់ជាងថ្ងៃម្សិលមិញ០,០៦ម៉ែត្រ។ កម្ពស់ទឹកត្រូវប្រកាសប្រុងប្រយ័ត្ន១៨,៥០ម៉ែត្រ។
តាមសេចក្ដីរាយការណ៍ពីមន្ទីរកសិកម្មរុក្ខាប្រមាញ់ និងនេសាទខេត្តកំពង់ធំ នាព្រឹកថ្ងៃពុធទី៣១ ខែកក្កដា ឆ្នាំ២០២៤បានឱ្យដឹងថា ស្ថានភាពការងារបង្ក បង្កើនផលស្រូវរបស់ប្រជាកសិករខេត្តកំពង់ធំគិតត្រឹមថ្ងៃទី៣០ ខែកក្កដា ឆ្នាំ២០២៤ អនុវត្តន៍ចំនួន ២០២ ៦០៣ ហិកតា ស្មើនឹង៩៤,៩៨ភាគរយ នៃផែនការ ២១៣ ៣០០ ខ្ពស់ជាងឆ្នាំមុនក្នុងរយៈពេលដូចគ្នាចំនួន៥៨២៩ហិកតា។
ស្ថានភាពផលប៉ះពាល់ និងខូចខាតលើដំណាំស្រូវដោយទឹកជំនន់ទឹកភ្លៀងចំនួន០៨ ក្រុង/ស្រុក។ កំពង់ស្វាយ ស្ទឹងសែន ប្រាសាទសំបូរ សណ្ដាន់ បារាយណ៍ សន្ទុក ស្ទោងនិងស្តុកតាំងគោក ស្មើនឹង៣២ឃុំ-សង្កាត់ លើ១៤២ភូមិស្មើនឹង៣៤២៩គ្រួសារ។ ផ្ទៃដីប៉ះពាល់ ចំនួន៤០៩៦ហិកតា និងខូចខាតទាំងស្រុងចំនួន២ ២៩១ហិកតាស្មើ១៦៥៣ គ្រួសារចំនួន១៩ឃុំ-សង្កាត់ ៧៨ភូមិលើផ្ទៃដីដំណាំស្រូវប៉ះពាល់សរុប៕
