ភ្នំពេញ៖ ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ នៅថ្ងៃទី១១ ខែមិថុនា ឆ្នាំ២០២៤ វេលាម៉ោង១៦៖១៥នាទី ត្រង់ចំណុច ផ្លូវ៥២២ ភូមិ១៣ សង្កាត់បឹងកក់១ ខណ្ឌទួលគោក នឹងផ្លូវ126 ភូមិ2 ក្រុម14 សង្កាត់ផ្សារថ្មី2 ខណ្ឌដូនពេញ រាជធានីភ្នំពេញ លោកវរសេនីយ៍ឯក ឡេង ប៊ុនហួរ នាយការិយាល័យព្រហ្មទណ្ឌកម្រិតស្រាល បានបញ្ជាកម្លាំងជំនាញការិយាល័យព្រហ្មទណ្ឌកម្រិតស្រាលដឹកនាំដោយ លោកវរសេនីយ៍ទោ មឿន ដារ៉ារិទ្ធ នាយរងការិយាល័យ បានស្រាវជ្រាវឃាត់ខ្លួនមុខសញ្ញាសកម្មចំនួន០២នាក់។
ជនសង្ស័យទី១៖ឈ្មោះ សុក កក្កដា ភេទប្រុស អាយុ៣៤ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះលេខ១៥៧ ផ្លូវលេខ៩០០ ភូមិទួលសង្កែ សង្កាត់ទួលសង្កែ និងទី២៖ឈ្មោះ ចាន់ សុធារ៉ា ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិលូ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។
ជនសង្ស័យពាក់ព័ន្ធករណី លួចមានស្ថានទម្ងន់ទោស ទទួលផលចោរកម្ម នឹងប្រើប្រាស់សារធាតុញៀន។ សំភារៈដកហូតរួមមាន ម៉ូតូចំនួន១គ្រឿង ម៉ាក HONDA DREAM 125CC ពណ៌ខ្មៅ ផលិតឆ្នាំ២០២៣ ពាក់ស្លាកលេខ តាកែវ 1AB-2219 (ស្លាកលេខមិនប្រក្រតី), ទុលឡាវីសដងជ័រ ចំនួន១, កូនសោចិញ្ចៀនកែឆ្នៃ ចំនួន១ និងដែកឆាបដងឈើ ចំនួន១។
ចំពោះម៉ូតូដែលបានដកហូតខាងលើ នាយកដ្ឋាន បានប្រគល់ជូនម្ចាស់ដើមវិញហើយ។ បច្ចុប្បន្ន ជនសង្ស័យខាងលេី កសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ចាត់ការបន្តតាមនីតិវិធី៕
ប្រភព៖ ការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ
