ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មីចំនួន ២៥គម្រោង ដែលមានទុនវិនិយោគសរុបប្រមាណជាង ២៤៦លានដុល្លារ នៅក្នុងខែឧសភា ឆ្នាំ២០២៤ ដោយប្រទេសចិនបានរួមចំណែកជិត ៥០ភាគរយ នៃទុនវិនិយោគសរុបក្នុងខែនេះ។
យោងតាមសេចក្ដីប្រកាសរបស់ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១០ ខែឧសភា ឆ្នាំ២០២៤ បានឱ្យដឹងថា គម្រោងថ្មីចំនួន ២៤គម្រោង និងគម្រោងពង្រីកផលិតកម្មចំនួន ១គម្រោង ត្រូវបានអនុម័ត ដែលមានទុនវិនិយោគសរុបប្រមាណជាង ២៤៦លានដុល្លារ អាម៉េរិក និងអាចបង្កើតការងារបានប្រមាណ ១៥ពាន់កន្លែង។
ប្រភពដដែលបានបញ្ជាក់ថា ក្នុងចំណោមគម្រោងវិនិយោគទាំង២៥ គម្រោង វិនិយោគដែលមាន ទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ១៧គម្រោង និងគម្រោងវិនិយោគដែលមានទីតាំងស្ថិត នៅក្នុងតំបន់សេដ្ឋកិច្ចពិសេសមានចំនួន ៨គម្រោង។
គម្រោងវិនិយោគទាំងនោះរួមមាន គម្រោងអភិវឌ្ឍន៍ស្ថានីយអគ្គិសនីដើរដោយ ថាមពលព្រះអាទិត្យ, គម្រោងបង្កើតរោងចក្រស្ល និងកែច្នៃលោហធាតុ, គម្រោងបង្កើតរោង ចក្រផលិតបំពង់ទីបដែក និងគម្រោងបង្កើតរោងចក្រកែច្នៃអាលុយមីញ៉ូម ជាដើម។
គួរបញ្ជាក់ផងដែរថា ក្នុងខែឧសភា ឆ្នាំ២០២៤ នេះ ការវិនិយោគ មកពីប្រទេសចិនស្ថិតនៅលំដាប់លេខរៀងទី១ ដោយបានរួមចំណែកជិត ៥០ភាគរយ នៃទុនវិនិយោគសរុប ខណៈដែលការវិនិយោគក្នុងស្រុកគ្របដណ្តប់ប្រមាណជិត ៣១ភាគរយ នៃទុនវិនិយោគសរុប៕
ប្រភព៖ AKP
