កំពង់ចាម៖ នៅយប់ថ្ងៃសុក្រ ទី២៤ ខែឧសភា ឆ្នាំ២០២៤នេះ លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បានចាត់បញ្ជាឲ្យកម្លាំងជំនាញ បន្ដពង្រឹងវិធានការបង្ការ ទប់ស្កាត់ និងបង្ក្រាបរាល់សកម្មភាពបទល្មើស ក្នុងនោះក៏មានសកម្មភាពក្មេងទំនើង ដើម្បីពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមជាតិ យ៉ាងមុឹងម៉ាត់ និងហ្មត់ចត់បំផុត រហូតមកដល់វេលាម៉ោង ២២:៤០នាទីយប់ ខណៈពេលកម្លាំងសមត្ថកិច្ច្ច បាននឹងកំពុងល្បាតចល័ត នៅលើផ្លូវជាតិលេខ៧ ត្រង់ចំណុចផ្លូវបំបែកផ្សារព្រៃទទឹង ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ក៏បានប្រទះឃើញក្មេងទំនើង ០១ក្រុម មានគ្នា០២នាក់ ប្រើប្រាស់មធ្យោបាយម៉ូតូ០១គ្រឿង ម៉ាកហុងដាឌ្រីមសេ១២៥ ប្រដាប់ដោយកាំបិតតាំងតោ ០១ដើម និងដាវ ០១ដើម ធ្វើសកម្មភាពជិៈម៉ូតូ កាន់ដាវអូសកាត់លើថ្នល់ ហើយត្រូវបានកម្លាំងសមត្ថកិច្ចឃាត់ខ្លួន និងដកហូតវត្តុតាងខាងលើ យកមកសាកសួរបំភ្លឺនៅអធិការដ្ឋាននគរបាលស្រុកព្រៃឈរ ។ បន្ទាប់ពីកម្លាំងជំនាញបានសាកសួរបំភ្លឺ ជនសង្ស័យទាំងពីរនាក់ ក៏បានសារភាពប្រាប់សមត្ថកិច្ចអំពីសកម្មភាពរបស់ខ្លួន ។
បច្ចុប្បន្នជនសង្ស័យ និងមធ្យោបាយ ព្រមទាំងវត្ថុតាងត្រូវបានឃាត់ទុកនៅអធិការដ្ឋាននគរបាលស្រុកព្រៃឈរ តាមបញ្ជាឯកឧត្តម វង្ស ប៊ុនវិសុទ្ធ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម និងបានកសាងសំណុំរឿងតាមនីតិវិធីជំនាញ ដើម្បីបញ្ចូនទៅអយ្យការអមសាលាដំបូងខេត្តកំពង់ចាម ៕
