ភ្នំពេញ៖ ការវិនិយោគរបស់រាជរដ្ឋាភិបាល ក្នុងវិស័យសុខាភិបាលក្នុងរយៈពេលជាងបី ទសវត្សរ៍ ចុងក្រោយនេះ មានចំនួនសន្ធឹកសន្ធាប់ ព្រមទាំងបាន និងកំពុងនាំមកនូវវឌ្ឍន ភាពសំខាន់ៗ ជាច្រើនគួរជាទីមោទនៈ។ ជាក់ស្តែង ការចំណាយសរុបលើវិស័យ សុខាភិបាលនៅកម្ពុជាកាលពីឆ្នាំ២០២៣ បានកើនដល់ចំនួនប្រមាណ ២២៩៣ប៊ីលានរៀល សមមូលនឹងប្រមាណ ៥៧៣លានដុល្លារអាម៉េរិក មានកំណើនជិតបីដង បើធៀបនឹង ឆ្នាំ២០១៣ ដែលមានចំនួន ត្រឹមតែ ៩០៣ប៊ីលានរៀល សមមូលនឹងប្រមាណ ២២៦លានដុល្លារអាម៉េរិក។
នេះបើតាមការគូសបញ្ជាក់របស់ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សា ជាតិគាំពារសង្គម ថ្លែងក្នុងពិធីប្រកាសដាក់ឱ្យអនុវត្តន៍ជាផ្លូវការផែនទីបង្ហាញផ្លូវ ឆ្ពោះទៅគ្រប ដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ ក្រោមអធិបតីភាព ដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី២៣ ខែឧសភា ឆ្នាំ២០២៤នេះ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានបន្តថា ជានិន្នាការទៅ មុខការចំណាយក្នុងវិស័យសុខាភិ បាលនេះនឹងបន្តកើនជាលំដាប់បន្ថែមទៀត ដោយផ្សារភ្ជាប់ទៅនឹងការពង្រឹងប្រសិទ្ធភាព និងស័ក្តិសិទ្ធិភាពចំណាយ ព្រមជាមួយនឹង ការបង្កើនលទ្ធផលសុខភាពរបស់ប្រជាពលរដ្ឋ។
បន្ថែមលើនេះ តាមរយៈការវិនិយោគលើវិស័យសុខាភិបាលនាពេលកន្លងទៅ សូចនាករមួយចំនួនបានឆ្លុះបញ្ចាំងយ៉ាងច្បាស់អំពីវឌ្ឍនភាពនៃដំណើរឆ្ពោះទៅការគ្របដណ្តប់សុខភាពជាសកលរួមមាន៖ ១.ការកើនឡើងកម្រិតសន្ទស្សន៍នៃការគ្របដណ្តប់ សេវាសុខាភិបាលសារវ័ន្តពី ២៤ភាគរយ ក្នុងឆ្នាំ២០០០ រហូតដល់ ៥៨ភាគរយ ក្នុងឆ្នាំ២០២១។ ២.ការកើនឡើងជាលំដាប់នៃអាយុរំពឹងរស់របស់ប្រជាពលរដ្ឋពី ៥៩ឆ្នាំ ក្នុងឆ្នាំ២០០០ រហូតដល់ ៧៦ឆ្នាំ ក្នុងឆ្នាំ២០២១។ ៣.ការថយចុះនៃទំហំចំណាយពីហោប៉ៅផ្ទាល់របស់ប្រជាពលរដ្ឋលើការថែទាំសុខភាពពីប្រមាណ ៧០ភាគរយ ក្នុងឆ្នាំ២០០០ មកនៅត្រឹមប្រមាណ ៦០ភាគរយ ក្នុងឆ្នាំ២០២០ និង ៤.ការថយចុះនៃ អត្រាមរណភាពមាតា និងទារក ដែលក្នុងនោះមរណភាពមាតា បានធ្លាក់ចុះពីប្រមាណ ៤៣៧នាក់ ក្នុងឆ្នាំ២០០០ មកនៅត្រឹម ១៥៥នាក់ ក្នុងឆ្នាំ២០២២ ក្នុងចំណោមទារក ១០០.០០០កំណើតរស់ និងមរណភាពទារកដែលទើបនឹងកើត បានធ្លាក់ចុះពី ៣៧នាក់ ក្នុងឆ្នាំ ២០០០ មកនៅត្រឹម ៨នាក់ ក្នុងឆ្នាំ២០២២ ក្នុងចំណោម ១០០០កំណើតរស់។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គមបានលើកឡើងថា ទន្ទឹមនេះសមាសធាតុនៃប្រព័ន្ធគាំពារសុខភាពសង្គមដែលរួមមាន មូលនិធិសមធម៌ សុខាភិបាល និងរបបសន្តិសុខសង្គមផ្នែកថែទាំសុខភាព ក៏ត្រូវបានដាក់ឱ្យអនុវត្តន៍ និងពង្រីកវិសាលភាពជាបន្តបន្ទាប់។ ជាសារបាន មូលនិធិសមធម៌សុខាភិបាល ត្រូវបាន ចាប់ផ្តើមអនុវត្តន៍សាកល្បងនៅ ក្នុងខេត្តសៀមរាប និងខេត្តតាកែវ កាលពីឆ្នាំ២០០០ និងត្រូវបានពង្រីកជា បន្តបន្ទាប់រហូតដល់ គ្របដណ្តប់មូលដ្ឋានសុខាភិបាលសាធារណៈ ទូទាំងប្រទេស ទាំងថ្នាក់ជាតិ និងថ្នាក់ ក្រោមជាតិ កាលពីឆ្នាំ២០១៥ ដោយឯកឧត្តម អគ្គបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ថា មូលនិធិសមធម៌សុខាភិបាលនេះ បានអនុញ្ញាតឱ្យពលរដ្ឋដែល មានបណ្ណសមធម៌ មានលទ្ធភាពប្រើប្រាស់សេវាជាសកលចំពោះកញ្ចប់សេវាសារវ័ន្ត នៃអន្តរាគមន៍គាំពារសុខភាពដែលមានគុណភាព ដោយផ្តល់នូវការការពារផ្នែកហិរញ្ញវត្ថុ ទល់នឹងផលវិបាកនៃជំងឺ និងដែលត្រូវបានពង្រីក វិសាលភាពដល់ក្រុមគោលដៅដទៃទៀតជាបន្តបន្ទាប់ចាប់ពីឆ្នាំ២០១៨មក ហើយគិតត្រឹម ខែមីនា ឆ្នាំ២០២៤ មូលនិធិសមធម៌សុខាភិ បាលបានគ្របដណ្តប់ លើពលរដ្ឋគោលដៅ ប្រមាណ ៤,៧លាននាក់ ស្មើនឹង ២៧ភាគរយ នៃចំនួនពលរដ្ឋសរុប៕
ប្រភព៖ AKP
