បន្ទាយមានជ័យ៖ លោកវរសេនីយ៍ឯក ប៉ែន សុគន្ធ មេបញ្ជាការស្តីទី កងពលតូចថ្មើរជើងលេខ៥១ នៅយប់ថ្ងៃចន្ទ ១៣កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី២០ ខែឧសភា ឆ្នាំ២០២៤នេះ បានដឹកនាំ នាយទាហាន ពលទាហាន អង្គភាពចំណុះកងពល ធ្វើលំហាត់យុទ្ធដំណើរទ័ព ដោយថ្មើរជើង ចម្ងាយ ៩គីឡូម៉ែត្រ ដោយឆ្លងកាត់ឧបសគ្គ ធម្មជាតិមួយចំនួន ដើម្បីពង្រឹងសមត្ថភាពជំនាញយុទ្ធវិធីរបស់កងទ័ព ឱ្យកាន់តែរឹងមាំនោះ។
លោកវរសេនីយ៍ឯក ប៉ែន សុគន្ធ មេបញ្ជាការស្តីទី កងពល បានមានប្រសាសន៍ បញ្ជាក់ថា ស្ថិតនៅក្នុងកាលៈទេសៈប្រទេសមានសុខសន្តិភាព ស្ថិរភាពនយោបាយ គឺជាឱកាសសម្រាប់កងទ័ពធ្វើការហ្វឹកហ្វឺន ពង្រឹងសមត្ថភាពជំនាញយុទ្ធវិធី កងទ័ពឱ្យបាន ស្ទាត់ជំនាញ ធានាបានទាំងបរិមាណ គុណភាព និងឆន្ទៈ មនសិការ ស្នេហាជាតិ ក្នុងការ អនុវត្តតួនាទី ភារកិច្ចរបស់កងទ័ព ដែលជាខឿនការពារជាតិ ការពារឯករាជ្យ អធិបតេយ្យភាព បូរណភាពទឹកដី សុខសន្តិភាព សណ្តាប់ធ្នាប់សង្គម ដើម្បីបុព្វហេតុជាតិ មាតុភូមិ និងប្រជាជន។
លោកមេបញ្ជាការស្តីទី កងពលបានបញ្ជាក់ទៀតថា ការហ្វឹកហ្វឺនកងទ័ព ជាវិស័យអាទិភាពមួយ នៃការកែទម្រង់ របស់កងយោធពលខេមរភូមិន្ទ សំដៅធ្វើទំនើបកម្ម និងបង្កើនសមត្ថភាព ដើម្បីការពារបូរណភាពទឹកដី ការពារសន្តិភាព ការពាររាជរដ្ឋាភិបាល ស្របច្បាប់ ការពារសន្តិសុខ និងសណ្ដាប់ធ្នាប់សាធារណៈ ក៏ដូចជាការអភិវឌ្ឍន៍លើគ្រប់វិស័យនៅកម្ពុជា។ ដូច្នេះយើងទាំងអស់គ្នា ត្រូវចូលរួមថែរក្សាសុខសន្តិភាព មិនអនុញ្ញាត ឱ្យជនណា ឬក្រុមណាមកបំផ្លាញសុខសន្តិភាពបានឡើយ ត្រូវរក្សាសាមគ្គីភាព និងស្មោះត្រង់ ជានិច្ចជាមួយប្រមុខរាជរដ្ឋាភិបាល គាំទ្ររាជរដ្ឋាភិបាលគ្រប់ពេលវេលា យើងមានសន្តិភាពមកដល់ពេលនេះ ដោយការសាមគ្គីភាព ឯកភាពគ្នា និងការស្មោះត្រង់ និងត្រូវពង្រឹងពង្រីក ការងារការកសាងធនធានមនុស្ស និងការកសាងអង្គភាពរបស់ខ្លួនឱ្យ កាន់តែរីកចម្រើន ថែមទៀតនោះ។
ក្រៅពីការងារហ្វឹកហ្វឺនពង្រឹងសមត្ថភាព កងកម្លាំងនៅតាមបណ្តាកងឯកភាពត្រូវ បានត្រៀមអន្តរាគមន៍ ២៤ម៉ោងលើ២៤ម៉ោង មានទាំងសម្ភារ មធ្យោបាយ សម្រាប់ជួយ សង្គ្រោះប្រជាពលរដ្ឋរងគ្រោះ ដោយគ្រោះមហន្តរាយធម្មជាតិផ្សេងៗឱ្យបានទាន់ពេលវេលា ផងដែរ៕
ប្រភព៖ AKP
