ព្រះសីហនុ៖ តាមការឱ្យដឹងពីការិយាល័យគ្រឿងយន្តកសិកម្ម និងការិយាល័យក្សេតសាស្ត្រ និងផលិតភាពកសិកម្ម នៃមន្ទីរកសិកម្មរុក្ខាប្រមាញ់ និងនេសាទខេត្តព្រះសីហនុបានឱ្យដឹងថា ការចុះស្រង់ទិន្នន័យ នៃការបង្កបង្កើនផលដំណាំស្រូវរដូវវស្សា គិតត្រឹមថ្ងៃអាទិត្យ ១២កើត ខែពិសាខ ឆ្នាំរោង ឆស័ក ព.ស ២៥៦៧ ត្រូវនឹងថ្ងៃទី១៩ ខែឧសភា ឆ្នាំ២០២៤នេះ នៅទូទាំងខេត្តព្រះសីហនុ កសិករកំពុងមមាញឹកក្នុងការភ្ជួររាស់ស្រូវរដូវវស្សាអនុវត្តន៍ បានចំនួន ៦ ៤៥៧ហិកតា ស្មើនឹង ៤៨,៥៥ភាគរយ និងការងារព្រោះស្រូវអនុវត្តន៍បានចំនួន ៥ ១៨៥ហិកតា ស្មើនឹង ៣៨,៩៨ភាគរយ នៃផែនការឆ្នាំសរុបចំនួន ១៣ ៣០០ហិកតា។
ដោយឡែកស្រុកព្រៃនប់ ការងារភ្ជួររាស់អនុវត្តបានចំនួន ៦ ២៦០ហិកតា ស្មើនឹង ៥៤,២៥ភាគរយ និងព្រោះអនុវត្តន៍បាន ៥ ១៣៨ហិកតា ស្មើនឹង ៤៤,៥២ភាគរយ នៃផែនការសរុបចំនួន ១១ ៥៤០ហិកតា។
ស្រុកកំពង់សិលា ការងារភ្ជូររាស់អនុវត្តន៍បានចំនួន ១៩៧ហិកតា ស្មើនឹង ១១,១៧ភាគ រយ និងព្រោះស្រូវអនុវត្តន៍បានចំនួន ៤៧ហិកតា ស្មើនឹង ២,៦៧ហិកតា នៃផែនការសរុប ១ ៧៦០ហិកតា។
បច្ចុប្បន្នការងារភ្ជួររាស់ សាបព្រោះស្រូវនៅទូទាំងខេត្តព្រះសីហនុ ប្រើប្រាស់ ឧបករណ៍ទំនើបគ្រឿងយន្តកសិកម្ម មានដូចជា ត្រាក់ទ័រ គោយន្តជាដើម ហើយចំពោះការ ភ្ជួររាស់តាមបែបបុរាណដោយប្រើប្រាស់ដោយគោ ក្របី សឹងតែមិនមាន សកម្មភាពនោះទេ ម្យ៉ាងទៀតដោយសារតែប្រជាពលរដ្ឋខ្វះកម្លាំងពលកម្ម ដោយសារតែកូន ចៅរបស់ពួកគាត់ ចេញទៅបម្រើការងារនៅតាមទីប្រជុំជនមានដូចជា រោងចក្រ សហគ្រាស និងក្រុមហ៊ុននានា។ល។
សូមបញ្ជាក់ថា ខេត្តព្រះសីហនុ មានក្រុងពីរ និងស្រុក៣ ហើយស្រុកចំនួនពីរ មានផ្ទៃដីបង្កបង្កើនផលស្រូវរដូវវស្សាដូចជា ស្រុកព្រៃនប់ និងស្រុកកំពង់សិលា ហើយក្រុង ស្រុកចំនួន៣ ផ្សេងទៀត មិនមានផ្ទៃដីបង្កបង្កើនផលស្រូវនោះទេ។ ទន្ទឹមនឹងការងារបង្ក បង្កើនផលស្រូវរដូវវស្សា ខេត្តព្រះសីហនុ ក៏មិនមានផ្ទៃដីបង្កបង្កើនផលស្រូវរដូវប្រាំងនោះដែរ ដោយសារកង្វះប្រភពទឹកនៅរដូវប្រាំង៕
ប្រភព៖ AKP
