ភ្នំពេញ៖ ក្រសួងអប់រំ យុវជន និងកីឡា បានរៀបចំការប្រឡងជ្រើសរើសសិស្សពូកែទូទាំង ប្រទេសលើកទី២៨ សម័យប្រឡងថ្ងៃទី១៣ ខែឧសភា ឆ្នាំ២០២៤ នាមណ្ឌលប្រឡងវិទ្យាល័យ ជា ស៊ីម សន្ធរម៉ុក រាជធានីភ្នំពេញ ដែលជាការប្រឡងដើម្បីជ្រើសរើសជ័យ លាភីសិស្សពូកែថ្នាក់ទី៩ និងថ្នាក់ទី១២ លើមុខវិជ្ជា អក្សរសិល្ប៍ខ្មែរ គណិតវិទ្យា និងរូបវិទ្យា ដែលមានបេក្ខជនមកចូលរួមប្រឡងចំនួន ២៤០នាក់ ក្នុងនោះស្រី ១២៧នាក់ ហើយចំពោះការប្រកាសលទ្ធផល និងការប្រគល់មេដាយ សម្ភារ និងប្រាក់រង្វាន់លើកទឹកចិត្ត គ្រោងនឹងធ្វើឡើងនៅថ្ងៃទី១៦ ខែឧសភា ឆ្នាំ២០២៤ ខាងមុខ។
បើតាមក្រសួងអប់រំ យុវជន និងកីឡា បានឱ្យដឹងថា ចំពោះជ័យលាភីម្នាក់ៗ នឹងត្រូវទទួលបានការឧបត្ថម្ភពីរដ្ឋទៅតាមចំណាត់ថ្នាក់នូវថវិកា និងសម្ភារផ្សេងៗរួមមាន៖ ប្រកាសទទួលស្គាល់សិស្សពូកែទូទាំងប្រទេស វិញ្ញាបនបត្រជ័យលាភីសិស្សពូកែ មេដាយ មួយគ្រឿង(មាស ប្រាក់ និងសំរឹទ្ធ ពីលេខ១ ដល់លេខ៣) ប្រាក់រង្វាន់តាមចំណាត់ថ្នាក់ និងប្រាក់រង្វាន់ ឬវត្ថុផ្សេងៗបន្ថែមទៀតពីសប្បុរសជន ហើយដើម្បីធ្វើឱ្យពិធីនេះកាន់ តែអធិកអធម ក្រសួងអប់រំ យុវជន និងកីឡា បានធ្វើការអំពាវនាវចំពោះ សម្តេច ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា និងសប្បុរសជនក្នុង និងក្រៅប្រទេស មេត្តាជួយឧបត្ថម្ភជាថវិកា ឬជាសម្ភារ សម្រាប់ជារង្វាន់លើកទឹកចិត្តបន្ថែមដល់ជ័យលាភីសិស្សពូកែទូទាំងប្រទេស និង គណៈកម្មការរៀបចំ សំដៅជំរុញចលនានេះឱ្យកាន់តែមានប្រសិទ្ធភាពខ្ពស់នៅឆ្នាំបន្តបន្ទាប់ ដោយសប្បុរសជននឹងត្រូវបានអញ្ជើញឱ្យចូលរួមក្នុងពិធីបិទការប្រឡង ចែកវិញ្ញាបនបត្រ និងរង្វាន់ជ័យលាភី ដើម្បីទទួលលិខិតថ្លែងអំណរគុណរបស់ក្រសួងអប់រំ យុវជន និងកីឡា។
ចំពោះថវិកា និងសម្ភារសប្បុរសជនអាចផ្ញើ ឬប្រគល់មកនាយកដ្ឋានកិច្ចការប្រឡង ស្ថិតនៅអគារលេខ ១៦៩ មហាវិថីព្រះនរោត្តម រាជធានីភ្នំពេញ ទូរស័ព្ទលេខ ០១២ ៨៤៣ ៤៧៥ , ០៧៧ ៩៩៤ ២០០ និង ០១៧ ៩៤១ ៤១៩។ ក្រសួង មានជំនឿយ៉ាងមុតមាំថានឹង ទទួលបាននូវការជួយឧបត្ថម្ភគាំទ្រពីសំណាក់ សម្តេច ឯកឧត្តម លោកជំទាវ លោក អ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា ទាំងអស់ដោយទឹកចិត្តសប្បុរសជាក់ជាមិនខានឡើយ។
ជាមួយគ្នានេះ ក្រសួងអប់រំ យុវជន និងកីឡា បានលើកឡើងថា ក្នុងគោល បំណងលើកកម្ពស់គុណភាពអប់រំ តាមរយៈការអភិវឌ្ឍធនធានមនុស្ស ដែលមានចំណេះដឹង និងជំនាញប្រកបដោយសមត្ថភាពខ្ពស់ សំដៅអភិវឌ្ឍន៍សេដ្ឋកិច្ច ក៏ដូចជាកសាង សង្គមជាតិឱ្យបានរឹងមាំ ក្រសួងអប់រំ យុវជន និងកីឡា តែងតែរៀបចំការ ប្រឡងជ្រើសរើសសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា សម្រាប់សិស្សថ្នាក់ទី៩ និងថ្នាក់ទី១២ ដោយនៅឆ្នាំនេះការប្រឡងបាន ប្រព្រឹត្តទៅចាប់ពីថ្ងៃទី១៣ ខែឧសភា ឆ្នាំ២០២៤ នៅវិទ្យាល័យ ជាស៊ីម សន្ធរម៉ុក រាជធានីភ្នំពេញ ហើយពិធីបិទការប្រឡង ចែកវិញ្ញាបនបត្រ និងរង្វាន់ជ័យលាភី នឹងប្រព្រឹត្តទៅនៅថ្ងៃទី១៦ ខែឧសភា ឆ្នាំ២០២៤ នៅមណ្ឌលប្រឡងនេះតែម្តង៕
ប្រភព៖ AKP
![May be an image of text](https://scontent.fpnh16-1.fna.fbcdn.net/v/t39.30808-6/436306592_843990531087705_8517703729503086027_n.jpg?_nc_cat=103&ccb=1-7&_nc_sid=5f2048&_nc_ohc=_3bw33TYQA0Q7kNvgElCiZz&_nc_ht=scontent.fpnh16-1.fna&oh=00_AYBR0xvrXTkyeA1_Ro3TwpABjRRjqxMcviBu5Xf6uiiBFg&oe=664A32DE)