ឧត្តរមានជ័យ៖ លោក ថាំង វីយុទ្ធដា ប្រធាននាយកដ្ឋានវិស្វកម្ម នៃក្រសួងធនធានទឹក និងឧតុនិយម សហការជាមួយ លោកប្រធានមន្ទីរធនធានទឹក និងឧតុនិយមខេត្តឧត្តរមានជ័យ និងលោក អនុប្រធានមន្ទីរធនធានទឹក និងឧតុនិយមខេត្តសៀមរាប អមដំណើរដោយលោកអនុប្រធាន នាយកដ្ឋាន និងក្រុមការងារបច្ចេកទេស បានអញ្ជើញចុះពិនិត្យទីតាំងគម្រោងមុនពេលចុះ អនុវត្តន៍ការងារ (ជំហាន២) នៅគម្រោងជីកស្ទឹងស្រែងបង្វែរចរន្តទឹក និងសាងសង់សំណង់ បេតុងបង្វែរទិសទឹក ដែលស្ថិតនៅឃុំស្លែងស្ពាន ស្រុកស្រីស្នំ ខេត្តសៀមរាប នៅថ្ងៃអាទិត្យ ៥កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី១២ ខែឧសភា ឆ្នាំ២០២៤។
ក្នុងឱកាសនោះ លោកប្រធាននាយកដ្ឋានវិស្វកម្ម បានមានប្រសាសន៍ថា គម្រោង បង្វែរចរន្តទឹកស្ទឹងស្រែងរួមមានទំហំការងារសំខាន់ៗ ដូចជា៖ ១.គម្រោងជីកស្ទឹងស្រែង បង្វែរចរន្តទឹក ប្រវែង ៤៥០ម, ២.សាងសង់ទំនប់បង្វែរចរន្តទឹកស្ទឹងស្រែង ប្រវែង១២០ម និង៣.សាងសង់សំណង់បេតុងបង្វែរទិសទឹក ប្រវែង ៨០ម៉ែត្រ។
លោកបានបញ្ជាក់ថា គម្រោងនេះអាចបង្កើនសមត្ថភាពស្រោចស្រពបន្ថែម ដល់ផ្ទៃដីបង្កបង្កើនផលរដូវវស្សាចំនួន ១៣៧៥ហិកតា និងរដូវប្រាំងចំនួន ១៣៥ ហិកតា ដោយមានប្រជាពលរដ្ឋប្រមាណ ១៤៩០គ្រួសារបានទទួលផលពីគម្រោងនេះ។
នៅថ្ងៃដដែលនោះដែរ លោកក៏បានចុះពិនិត្យវឌ្ឍនភាពគម្រោងស្តារ ឡើងវិញ ទំនប់អាងទឹកត្រពាំងវែង ស្ថិតនៅសង្កាត់កូនគ្រៀល ក្រុងសំរោង ខេត្តឧត្តរមានជ័យ ដោយ លោកបានថ្លែងថា គម្រោងស្តារឡើងវិញទំនប់អាងទឹកត្រពាំងវែង គិតមកដល់ពេលនេះ វឌ្ឍនភាពការងារសម្រេចបានប្រមាណ ៨០ភាគរយ ក្នុងនោះការងារស្តារឡើងវិញទំនប់អាងទឹកត្រពាំងវែង (បាក់ដាច់) ប្រវែង ៣០០ម៉ែត្រ សម្រេចបាន ១០០ភាគរយ រៀបថ្មជើងទេរ ទំនប់អាងទឹកត្រពាំងវែង ប្រវែង ១៣០០ម សម្រេចបាន ៨៥ភាគរយ និងការងារ ជួសជុលកន្ទុយសំណង់ទ្វារទឹកលើទំនប់អាងទឹកត្រពាំងវែង ១កន្លែង សម្រេចបាន ១៥ភាគរយ។
លោក ថាំង វីយុទ្ធដា បានបញ្ជាក់ថា គម្រោងនេះអាចបង្កើនសមត្ថភាពស្រោចស្រព បន្ថែមដល់ផ្ទៃដីបង្កបង្កើនផលរដូវវស្សាចំនួន ៧៣៧ ហិកតា និងរដូវប្រាំងចំនួន ១៥០ហិកតា ដោយមានប្រជាពលរដ្ឋប្រមាណ ១៧៩គ្រួសារបានទទួលផលពីគម្រោងនេះ៕
ប្រភព៖ AKP
