កណ្តាល៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោកជំទាវ គឹម សេដ្ឋានី រដ្ឋលេខាធិការប្រចាំការ នាព្រឹកថ្ងៃទី១០ ខែឧសភា ឆ្នាំ២០២៤នេះ បានអញ្ជើញចុះពិនិត្យមើលវឌ្ឍនភាព និងបញ្ហាប្រឈមលើការ អនុវត្តសាលារៀនគំរូនៅវិទ្យាល័យហ៊ុន សែនស្អាង ស្ថិតក្នុងស្រុកស្អាង ខេត្តកណ្តាល និងនៅសាលាបឋមសិក្សាអនុវត្ត ប៊ុន រ៉ានី ហ៊ុនសែន ស្ថិតនៅក្នុងក្រុងតាខ្មៅ ខេត្តកណ្តាល ដោយមានការអញ្ជើញចូលរួមពី ឯកឧត្តម គង់ សោភ័ណ្ឌ អភិបាលនៃគណៈអភិបាល ខេត្តកណ្តាល និងមន្ត្រីពាក់ព័ន្ធជាច្រើនរូបទៀត។
នាឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានមានប្រសាសន៍ថា គោលបំណងរបស់យើងនៅពេលនេះ គឺដើម្បីពិនិត្យមើលពីវឌ្ឍនភាព និងការគាំទ្រការដោះ ស្រាយបញ្ហាប្រឈមលើការអនុវត្តស្ដង់ដារសាលារៀនគំរូ និងពិនិត្យពិភាក្សាជាមួយគណៈ គ្រប់គ្រង គ្រូបង្រៀន សហគមន៍ និងអ្នកពាក់ព័ន្ធលើការអនុវត្តស្ដង់ដារសាលារៀនគំរូ និងមានការណែនាំខ្លះៗដោយផ្ដោតទៅលើការធ្វើកំណែទម្រង់សាលារៀនគំរូ និងការអនុវត្ត សាលារៀនគំរូ ដោយបានរៀបចំស្ដង់ដារសាលារៀនគំរូ ហើយធ្វើឱ្យមានការប្រែក្លាយជា សាលារៀនគំរូ ដែលផ្ដោតលើលទ្ធផលនៃការសិក្សាផងដែរ ដោយឯកឧត្តមបានណែនាំឱ្យ មានការរៀបចំគម្រោងផ្សេងៗ ដើម្បីកែប្រែជាសាលារៀនគំរូ និងបានណែនាំឱ្យអនុវត្តន៍ សកម្មភាពមួយចំនួនដូចជា៖ លើកកម្ពស់ការប្រឡងជ្រើសរើសគ្រូបង្រៀនឱ្យមានការទទួល ស្គាល់ពីអាណាព្យាបាលសិស្ស ទាំងកិត្តិយស ទាំងកិត្តិនាមរបស់គ្រូ និងពង្រឹងស្ដង់ដារ វិជ្ជាជីវៈគ្រូបង្រៀន ធ្វើការកែលម្អការរៀនរបស់សិស្ស និងការបង្រៀនរបស់លោកគ្រូ អ្នកគ្រូជាដើម។
ដើម្បីជំរុញដំណើរការគាំទ្រ និងលើកកម្ពស់ផ្នែកបច្ចេកទេស ហើយប្រែក្លាយ ជាវិទ្យាល័យគំរូឱ្យកាន់តែប្រសើរឡើងនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ហង់ជួន ណារ៉ុន បានផ្ដល់អនុសាសន៍ណែនាំទៅដល់សាលារៀន ឱ្យបង្កើតគណៈកម្មការ គ្រប់គ្រងសាលា ដើម្បីមានគណនីភាពចំពោះសិស្ស ការកែលម្អលទ្ធផលរបស់សិស្ស តាមរយៈការធ្វើតេស្ដស្ដង់ដារចាប់ពីកុមារតូច ការពង្រឹងស្មារតី និងភាពក្លាហាន មានរបៀប មានវិន័យក្នុងការរស់នៅ និងការគ្រប់គ្រងខ្លួនឯង លើកកម្ពស់ការសិក្សាបន្ថែមម៉ោង ស្វ័យសិក្សា និងការប្រើប្រាស់បច្ចេកវិទ្យា ដើម្បីរៀនស្វែងរកចំណេះវិជ្ជាដោយខ្លួនឯង ការបង្រៀនពេញមួយថ្ងៃដែលជាការបង្រៀនគួរតាមការស្ម័គ្រចិត្ត និងដោយមានការគាំទ្រ ការពង្រឹកអភិបាលកិច្ចសាលារៀនជាដើម។ល។
ជាមួយគ្នានោះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងអំណរគុណយ៉ាងជ្រាលជ្រៅចំពោះការខិតខំប្រឹងប្រែង បំពេញ តួនាទីភារកិច្ច យកអស់កម្លាំងកាយចិត្តរបស់លោក លោកស្រី នាយក នាយិកា លោកគ្រូ អ្នកគ្រូ និងបុគ្គលិកអប់រំទាំងអស់ ព្រមទាំងអាជ្ញាធរមូលដ្ឋាន ក្នុងការចូលរួមលើកកម្ពស់ វិស័យអប់រំនៅកម្ពុជាឱ្យកាន់តែប្រសើរឡើង ជាពិសេសចំពោះបរិស្ថាន ស្អាត មានអនាម័យ។
ឯកឧត្តមក៏បានបញ្ជាក់ពីវិធានគន្លឹះសំខាន់ៗ ដែលត្រូវបញ្ជ្រាបក្នុងការអនុវត្តស្តង់ដារ សាលារៀនគំរូដែលរួមមាន៖ កិច្ចប្រតិបត្តិការ និងរដ្ឋបាលរបស់សាលារៀន ផ្ដោតការវាយ តម្លៃការងាររបស់បុគ្គលិក និងគណនីភាពរបស់សាលារៀន ណែនាំឱ្យមានការលក់ចំណី អាហារឱ្យមានគុណភាព និងកុំឱ្យមានការលក់បារីអេឡិកត្រូនិចនៅក្បែរសាលារៀនជាដើម៕
ប្រភព៖ AKP
