ភ្នំពេញ៖ គណៈកម្មការបញ្ជីសារពើភណ្ឌទ្រព្យសម្បត្តិរដ្ឋ រៀបចំចុះបញ្ជីដីរដ្ឋ និងធ្វើវិញ្ញាបនបត្រសម្គាល់អចលនវត្ថុរបស់កងយោធពលខេមរភូមិន្ទ បានបើកកិច្ចប្រជុំពិភាក្សា និងពិនិត្យមើលអំពីការធ្វើបច្ចុប្បន្នភាព នៃការគ្រប់គ្រងអចលនទ្រព្យរបស់កងយោធពលខេមរភូមិន្ទ ឆ្នាំ២០២៤ ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាព្រឹកថ្ងៃទី០៩ ខែឧសភា ឆ្នាំ២០២៤ នៅទីស្ដីការក្រសួងការពារជាតិ។
ក្នុងរបៀបវារៈនៃកិច្ចប្រជុំ គឺបានផ្ដោតទៅលើការស្ដាប់នូវរបាយការណ៍សង្ខេបប្រចាំឆ្នាំ ស្ដីពីការធ្វើបញ្ជីសារពើភ័ណ្ឌឆ្នាំគោល២០១៩ តារាងប្រៀបធៀបឆ្នាំ២០២០ និងឆ្នាំ២០២១ និងលទ្ធផលអង្គប្រជុំកាលពីលើកមុន ដែលមានការផ្លាស់ប្ដូរប្រធានគណៈកម្មការដឹកនាំជាបន្តបន្ទាប់ និងការស្ដាប់លទ្ធផល នៃកិច្ចប្រជុំឆ្លងសេចក្តីសម្រេច នៃការបង្កើតអនុគណៈកម្មការរៀបចំចុះបញ្ជីដីរដ្ឋ នឹងធ្វើវិញ្ញាបនបត្រសម្គាល់ម្ចាស់អចលនទ្រព្យទាំង ៧ និងក្រុមការងារទាំង ៤ របស់លេខាធិការដ្ឋាន និងរបៀបវារៈរបស់អង្គប្រជុំ ដែលបានឆ្លងផែនការសកម្មភាពរបស់ក្រុមការងារនៅពេលខាងមុខ។
នាយឧត្តមសេនីយ៍ ទៀ សីហា បានបញ្ជាក់ថា៖ ផែនការការងាររៀបចំចុះបញ្ជីដីរដ្ឋ និងធ្វើវិញ្ញាបនបត្រសម្គាល់ម្ចាស់អចលនទ្រព្យ នៃកងយោធពលខេមរភូមិន្ទធ្វើឡើងគឺក្នុងគោលបំណងដើម្បីឱ្យបានជ្រោតជ្រាបរាល់បែបបទ នីតិវិធីនានា ក្នុងការចុះបញ្ជី ហើយត្រូវត្រួតពិនិត្យតាមដាន និងធ្វើរបាយការណ៍ឡើងវិញ ពីប្រវត្តិអចលនទ្រព្យ របស់កងឯកភាពទាំងអស់ ទូទាំងកងយោធពលខេមរភូមិន្ទ ដោយសុក្រិត្យភាពបំផុត ក្នុងការរៀបចំចុះបញ្ជីដីរដ្ឋ និងធ្វើវិញ្ញាបនបត្រសម្គាល់ម្ចាស់អចលនវត្ថុ របស់កងឯកភាពនីមួយៗឱ្យស្របទៅតាមទិន្នន័យ ដែលមាននៅក្នុងបញ្ជីសារពើភ័ណ្ឌ ដែលជាទ្រព្យសម្បត្តិរបស់រដ្ឋកន្លងមក។ សម្រាប់ផែនការនេះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបញ្ជាក់ច្បាស់ថា៖ គឺមានគោលបំណង ដើម្បីពង្រឹងការកាន់កាបអចលនទ្រព្យ របស់រដ្ឋដោយស្របច្បាប់ គ្រប់បណ្ដាទីតាំង ដែលជាមូលដ្ឋានរបស់ស្ថាប័ន អង្គភាព ទូរទាំងកងយោធពលខេមរភូមិន្ទ ដើម្បីបញ្ចៀសបាននៅបាតុភាព ការទន្ទ្រានកាន់កាប់ដីរដ្ឋ និងអចលនវត្ថុនានា ដែលគ្រប់គ្រងដោយកងយោធពលខេមរភូមិន្ទ ពីសំណាក់ជនឱកាសនិយម ដែលតែងតែបង្កទំនាស់ កើតមានឡើងជាហូរហែនាពេលកន្លងមក។
ឯកឧត្តម ឧបនាយករដ្ឋមន្ត្រី ទៀ សីហា ក៏បានសំណូមពរដល់ប្រធាន និងអនុប្រធាន នៃអនុគណៈកម្មការទាំង ៧ ជួយជំរុញបណ្ដាអង្គភាពប្រើប្រាស់ ដែលធ្វើបញ្ជីសារពើភ័ណ្ឌទ្រព្យសម្បត្តិរដ្ឋឆ្នាំគោល២០១៩ ឱ្យបានលឿន ហើយក៏ត្រូវពន្លឿនការងារចុះបញ្ជីសារពើភ័ណ្ឌនេះឱ្យបានលឿន ដើម្បីបញ្ជូនទិន្នន័យទៅក្រសួងសេដ្ឋកិច្ច និងហិរញ្ញវត្ថុ ចៀសវាងការពន្យារពេលយូរឆ្នាំតទៅទៀត។ ឯកឧត្តម ក៏បានសំណូមពរ ដល់ប្រធានស្ថាប័នអង្គភាព គ្រប់អង្គភាព ដែលប្រើប្រាស់ដីរដ្ឋ ត្រូវដាស់តឿន និងជំរុញជំនាញរបស់ខ្លួន ដែលទទួលការងារបញ្ជីសារពើភ័ណ្ឌ ដើម្បីអនុវត្តន៍ឱ្យបានទាន់ពេលវេលា និងត្រឹមត្រូវតាមការណែនាំរបស់ក្រសួងសេដ្ឋកិច្ច និងហិរញ្ញវត្ត។
ទន្ទឹមនឹងនេះដែរ ឯកឧត្តមរដ្ឋមន្ត្រី ក្រសួងការពារជាតិ ក៏បានក្រើនរំលឹក ដល់មេបញ្ជាការ និងថ្នាក់ដឹកនាំគ្រប់លំដាប់ថ្នាក់ គ្រប់បណ្ដាអង្គភាពកងទ័ព ដោយធ្វើយ៉ាងណាត្រូវគ្រប់គ្រងឱ្យបាន នៅរាល់ទ្រព្យសម្បត្តិរបស់រដ្ឋ ដោយយកចិត្តទុកដាក់មកពិនិត្យពិច្ច័យចុះបញ្ជីឱ្យបានទាន់ពេលវេលា រាល់អចលនទ្រព្យ ដែលជាទ្រព្យសម្បត្តិរបស់រដ្ឋឱ្យបានទាន់ពេលវេលា ដើម្បីបញ្ចៀសបាន រាល់បាតុភាពទាំងឡាយដែលកើតមានឡើង ៕
ប្រភព៖ AKP
